Atornerluisoqareersoq: Panimma siunissartik qaamasuusoq isaanni ersileqqippoq

Heidi Møller Isaksenip panii marluk kinguaassiuutitigut atornerlugaanikuupput. Angajoqqaat neriuutinitsinniarlugit sassarpoq

Heidi Møller Isaksen oqaluttarfimmut sassarami ataasinngormat kingullermik, piareersimasutut misigaaq. Anaanatut misiginikuusani nuanniitsut eqqartorpai. Ulluinnarni eqqartugaaneq ajortut sassarluni oqaluttuarai.

Panimi atornerlugaasimaneri pillugit oqaluttuartussanngorami oqaluttarfimmut qaqigami ajornaatsuinnaasimanngilaq.

- Oqaluttuassara naammassisinnaanerlugu qulaleraluarpunga. Eqqarsarpunga ilumut maani sunerlunga. Oqaluttuarnerma immiunneqarnerani takusinnaavara nipera allanngortoq, aallartilluareeramali ajorunnaartoq aamma takusinnaallugu.

Kinguaassiuutitigut atornerluisarnermut akiuiniarnissamut suliniut Killiliinermut peqataarusunnersoq ukioq kingulleq Heidi Møller Isaksen aperineqarpoq. Eqqarsariaqqaarnani peqataanissani akueraa, tassanilu misiginikuusani eqqartortussanngorpai - siunissarlu qaamaneqartoq aamma eqqartortussanngorlugu.

- Ulluinnarni oqaluuserineqanngisaannartut ammaanneqartariaqarput. Oqaluuserinissaanut pitsaanerusariaqarpugut, kinguaassiuutitigummi atornerluisarnerit unitsinneqarluinnartariaqarput. Annernartaqaarmi meeqqat allat atornerlugaanikut takullugit.

- Misigisanit ingerlariaqqissinnaaneq pillugu aamma oqaluttuarniarlunga aalajangerpunga.

Meeraq tusarnaartaruk
Suliniutip saqqummiunneqarnissaanut peqataanissaminut aalajangerpoq. Oqaatsit ikitsut assitaliiginnarnerlu naammaginngilaali. Heidi Møller Isaksenip oqaluttuaq tamaat saqqummiukkusuppaa, Kalaallit Nunaannut tamanut paasissutissanngorlugu.

- Meeqqat atornerlugaasimanerat oqaluuserinngikkaanni meeqqanut ajorninnguinnartussaavoq.

Atornerluisoqarsimagaangat angajoqqaat eqqarsarluaqqaarlutik iliuuseqartarnissaat eqqaasissutigaa.

- Angajoqqaatut iliuuseqarsinnaasutut akisussaaffimmillu tigusisinnaasutut meeqqanut takutissinnaasariaqarparput. Inersimasorpassuit taamaattunik tusarlerneqaraangamik sakkortuumik iliuuseqarsinnaasarput, tamanna meeqqanut peqqinnanngitsuuvoq.

- Meeqqat tatiginnillutik isertugaatitik saqqummiuttarpaat, tatiginninnerat atornerlunnagu iliuuseqartoqarsinnaasariaqarpoq.

Paniminut kinguaassiuutitigut atornerluisoqareersoq ilaquttaminut paniminullu illersuisalerpoq.

- Løvitut meeqqakka illersortalerpakka, oqarpoq.

Paniisali misigisimasaat imaannaanngillat, paniatami aappaa marloriarluni imminut toqunniaraluarpoq, aappaa ataaseriarluni imminut toqoriaraluarluni.

- Panikka inoorusukkunnaaraluarput, tassami inuit tamarluinnaasa suneqarsimanertik ilisimalersimavaat. Kanngusungaarlutik inuulerput, ilaqutariittut inuunerput aserorneqarluni. Neriuuteqarunnaariartortut misigaara takullugulu, soriarsinnaanngitsutullu misigalunga, Killiliisap saqqummiunneqarnerani oqaluttuarpoq.

Panimi imminut toqunniarlutik misileereernerisa kingorna Heidi Møller Isaksen paniminut illersuisupilussuanngorpoq.

Misigisimasaat Heidimut aamma sunniuteqarput, ikiorneqartariaqalersutullu misigilerluni. Ikiorserneqarami misigisimasaminut utersaaqqittutut misigilerpoq, atornerluisoqarsimaneranullu pisooqataasutut misigisimalerluni.

- Oqaloqatigalugu peqqissaasuma utersaarnera ajunngitsuusoq oqaatigaa. Taama oqarnera paasisinnaanngilluinnarpara. Oqarmat siumut kisimi ingerlariaqqittoqarsinnaalersoq paasisinnaalerpara.

Aliasunnini, kassimanini anniaatinilu peerneqanngisaannarsinnaanera akuerilerpaa.

- Imminut nalliginissaq iluaqutaasinnaanngitsoq paasilerpara, Heidi Møller Isaksen oqarpoq.

Paniisa imminut toqoriareernerisa kingorna katsorsarneqarnissamut piareersimasimanngillat, taamaattoq Nuummi Multiværkstedimi paasineqarneq akuerineqarnerlu misigivaat. Suliniummi 'Timi Asimi'-mi aamma peqataanerat pitsanngorsaataasimasoq anaanaasup oqaatigaa.

- Neriuutineqqikkiartuaarnerat takusinnaanngoqqippara, Heidi nuannaarluni oqarpoq.

Kinguaassiuutitigut atornerluisarneq pillugu akiuiniarnermut sulilluartoqartoq Heidip oqaatigaa, taamaattoq suli iliuuseqartoqartariaqartoq naqissuserlugu.

- Pasitsaassiinnartoqaraluarpalluunniit suliassaqartoqartoq isersitsiinnarpoq, oqalugiaammini oqaatigaa.

Kinguaassiuutitigut atornerluisarnerup akiorneqarnissaa aniguivittoqarnissaata tungaanut suleqataaniarpoq.

Powered by Labrador CMS