eqqartuussivimmi aalajangiineq
Atornerluisoq killiligaanngitsumik paarnaarussassanngorneqartoq
Kalaallit Nunaanni Eqqartuussiviup ullumi angut 47-nik ukiulik killiligaanngitsumik paarnaarussassanngortippaa, 2016-imi januaarimit qaammatinilu pingasuni niviarsiaqqamik taamani 13-inik ukiulimmik atoqateqarsimanera pissutigalugu.
Sermersuumi Eqqartuussiviup ukiormanna februaarip 24-anni eqqartuussutigisaa, eqqartuussisuuneqarfiup aalajangiiffigaa. Tamatuma saniatigut 30.000 koruuninik taarsiiviginninnermut akiliuteqassaaq.
Angut aamma akiliilluni atoqatiginnissimasutut unnerluutigineqaraluarpoq, kisianni taakkunani eqqartuussivinni marlunni tassani pinngitsuutinneqarpoq.
Niviarsiaqqap arnaata marsimi 2016-imi angut taanna nalunaarutigaa.
- Eqqartuussiviup pineqartoq pisuunerarlugu aamma piffissaligaanngitsumik paarnaarussassanngortimmagu naammagisimaarpara. Niviarsiaqqamut imaannaanngitsumik kinguaassiutitigut atornerluineq tassani pineqarpoq, tamannalu inuiaqatigiinni akuersaarneqarsinnaanngilaq, unnerluussisussaatitaasoq Tobias Berg oqaaseqarpoq.