Skip to main content

Atornerluinerit: Tasiilami meeqqat - immaqa - inuusuttuunerup ilaa uterteqqissavaat

Kinguaassiutitigut kanngutsaatsiliornerit itisuunik kingunerlutsitsisinnaapput. Angalaqatigiit meeqqat Tasiilamiittut ikiussavaat

Tasiilami meeqqat kinguaassiutimikkut kanngutsaatsioliorfigineqarsimasut ilaannut maanna ikiuiartortoqalerpoq.

Angalaqatigiit marlunnik psykoterapeutertaqartut ukiumi aggersumi katsorsaanissamik neqeooruteqassapput.

Taamatut katsorsartinneq meeqqat atornerlunneqarnerisa kongorna inuunerannut aalajangiisuulluinnarsinnaavoq, pilertortumik katsorsarneqanngikkaanni sakkortuumik kingunerlutsitsisoqarsinnaavoq.

Atornerlugaasimasunut tusarnaarluni tamatuma qanoq ilungersunartiginera paasineqarsinnaavoq. 

- Inuusuttuunera annaavara. 14-nit 21-nut ukioqarninni suna tamarmi uannut unittoorpoq, eqqumiitsuliortoq Gukki Nuka oqaluttuarnikuuvoq. Taanna arsarnermik sungiusaasuminit 14-nik ukioqarluni atornerlunneqarpoq. 

Henrik Thomsenip isertugaatini tamaviaarluni toqqortorniarsarisimallugu oqaluttuarnikuuvoq, tamatumalu isumatsangaarsinnaasarsimavoq imaluunniit kamarujussuariasaartarluni.

- Ukiut taakku inuuninni oqimaaqaat. Piffissap taassuma eqqaamaniarnera ajornakusoortittorujussuunikuuara, meeraaninni puullaaqisorujussuunera pissutigalugu, Henrik Thomsen, Sermitsiaq.AG-mut taama oqaluttuarnikuuvoq.

LÆS OGSÅ: Meeqqat atornerlugaasimasut angalallutik katsorsaasartunit katsorsarneqartassasut

Connie Arenas peqqarniitsumik atornerlugaanikuunermi kingorna ikiortissarsiorsimagaluarpoq. Kisianni ikiortissaqarsimanngilaq, atornerluisullu sinnattupillunni malersugarineranik kinguneqarpoq.

- Atornerlugaanerma kingorna ukiut marluk pingasut siulliit eqqaamasaqarfiginngilakka, taanna KNR-imi qineqqusaartoqarnerani oqarpoq.

 

Maanna angalaqatigiit meeqqat Tasiilamiittut ilaasa meeraanerannik minnerpaamik utertitseqqissinnaapput.

Eqimattakkaarluni oqaloqatigiinneq

Psykoterapeutit marluk ukiumi ataatsimi qaammatit tamaasa sapaatip-akunnera illoqarfimmut tikeraartassapput. Meeqqat inuusuttullu arfinillit aamma 17-it akornanni ukiullit atornerlugaasimasut katsorsarneqarnissaannut neqeroorfigineqarnissaat pilersaarutaavoq. Tamanna pingaarnertut eqimattakkaarluni katsorsartinnermi pissaaq. Eqimattat meeqqat ukiui suiaassusaallu naapertorlugit agguataarneqassapput.

- Meeqqat sisamat tallimat eqimattami ataatsimiittassapput, eqimattanik marlunnik immaqa pingasunik nukappiaqqanut niviarsiaqqanullu eqimattaliorsinnaanissarput naatsorsuutigaara, Ellen Magnussen, Kommuneqarfik Sermersuumi suliaqarfimmi pisortaq oqarpoq.

Angalaqatigiit juunimik siullermeerlutik Tasiilamut tikeraarput, tassani psykoterapeutit paasiniaapput. Meeqqat attaveqarfigineqarnissaat alloriarnerup tullerissavaa.

- Meeqqat ilisimasaqarfigisagut aallaqqaasiutigalugit attaveqarfigissavagut, assersuutigalugu atuarfimmit nalunaaruteqartoqareernikuunera pissutigalugu, Ellen Magnussen oqarpoq.

Kommunip nutaanik nalunaarfigineqartarnera ilutigalugu meeqqat taakkua katsorsarneqarnissaminnut neqeroorfigineqartassapput.

LÆS OGSÅ: Kiisami: Tasiilami meeqqat suleqatigiilluarnikkut ikiorneqarnissaat qulakkeerneqarpoq

Psykoterapeutit misilittagartuut marluk angalaqatigiinnut ilaapput. Taakku siornatigut meeqqanut angalaqatigiittut aallartitaasareerput, tassanngaanniillu misilittakkat Tasiilami suliniummut ilaassapput.

Eqimattakkaarluni oqaloqatigiittarnerup saniatigut aamma ataasiakkaarluni oqaloqateqarnissamut periarfissaqassaaq, taamatullu aamma ammasumik siunnersuisoqassalluni. Aammattaaq angajoqqaanut tapersersuinerit oqaluuserineqassapput, taavalu unnukkut qulequttanik sammisaqartitsisoqassaaq.

- Misilittakkatik aamma takusatik naapertorlugit nammineerlutik qanoq iliuuseqartoqassanersoq aaqqissussavaat, taamaalillutik pitsaanerpaamik pisariaqartinneqartut naammassiniassagamikkit, Ellen Magnussen oqarpoq.

Najugaqartut ikiortaasut

Tasiilami sulisut marluk psykologinut ikiortitut sulitinneqassapput. Taakku psykoterapeutinut tapertaanissaat takorluugaavoq, kiisalu sulisut ulluinnarni meeqqat pitsaanerusumik ikiorsinnaassammatigit. Tamatuma saniatigut piffinni angalaqatigiit illoqarfimmiitinnagit pinartuni ikiuuttarniassammata. Minnerunngitsumillu ukiup ataatsip qaangiunnerani misilittagaqalerluarsimaguni, psykoterapeutinut taartaalernissaat neriuutigineqarpoq.

Angalaqatigiit ukiumi ataatsimi Tasiilamut tikeraartarnissaat maannamut pilersaarutaavoq. Tamatuma kingorna suliniut nalilersorneqassaaq, kingornalu qanoq nanginneqarnissaa aalajangiiffigineqassalluni.

- Taamatut iliuuseqarneq ingerlatiinnarumaaripput naatsorsuutigilluinnarpara, kisianni allatut iluseqarnissaa ilimanarpoq, Ellen Magnussen naliliivoq.

Angalaqatigiit Isumaginninnermut Aqutsisoqarfik peqatigalugu pilersinneqarpoq, terapeutip aappaa kommunimit akilerneqarluni, aappaalu Naalakkersuisunit.

2019-ip naanerata tungaanut Tasiilaq aamma inerismasunut meeraanerminni atornerlunneqarsimasunut kingunerlutsitsisunut angalaqatigiinnit tikeraarneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER