Kukkunersiuisut misissuinerat

Atornerluinerit suli amerlanerusimapput

Aleqa Hammondip Siumumit Folketingimut qinigassanngortinnissaata aalajangiunneqarsimasoq saqqummiunneqareersorlu taassuma nunatta karsiata aningaasaataanik atornerluisimanera kukkunersiuinermut ataatsimiititaliamut ilaasortamit maanna saqqummiunneqarpoq

Agathe Fontain maanna ilisimatitsivoq, Aleqa Hammondip nunatta karsiata aningaasaataaanik atornerluisimanera maannamut saqqummiunneqartunit annertunerusoq kukkunersiuinermut ataatsimiititaliap paasisimagaa.

Kukkunersiuisut Aleqa Hammondip tungaanit pisortat aningaasaataannik atornerluinernik nutaanik nassaarsimapput. Taama partii illuatungiliuttoq IA sinnerlugu Kukkunersiuinermut Ataatsimiititaliamut ilaasortaq, Agathe Fontain, tusagassiorfinnut nalunaarummi ilisimatitsivoq.

Tallimanngornermi Qanoruumi takuarput Aleqa Hammondip Kukkunersiuinermut Ataatsimiititaliap 2014-imut naatsorsuutinut isumaliutissiissut isumaliutissiissutaanngitsutut inissinniarsarigaa. Kukkunersiuinermut Ataatsimiititaliap isumaliutissiissutaani atuarneqarsinnaavoq Nunatta Karsia arlalippassuariarluni atornerluttarsimagaa.

- Oqarnera Naalakkersuisunut ilaasortarpassuit ilaquttatik akiliutitittarsimagaat, isumaqartinniarsaralugulusooq nammineq ajortuliorsimanani. Aleqa Hammondip tikkuartariaqarpai kikkut Naalakkersuisunut ilaasortarpassuit taamaaliortarsimanersut, Agathe Fontain isumaqarpoq.

Isumaliutissiissutit bilagiini atuarneqarsinnaavoq, atornerluinerit siulliit saniatigut, Kukkunersiuisut misissueqqimmata, Aleqa Hammond atornerluinernik nutaanik nassaarfigineqaqqittoq, tassa Bruxellesimut angalanermini, Parisimut feeriaramik aamma Islandimi angalanermi sivitsuisimasoq privatimik angutaatinilu Nunatta Karsiata akiligaanik, Agathe Fontain paasissutissiivoq.

- Aleqa Hammond oqarpoq inuit tamarmik kukkussuteqartartut. Kikkulli tamarmik Nunatta Karsia kassekredittitut atornerlunneq ajorpaat inatsisitigullu unioqqutitsillutik atuisarlutik, partiip illuatungiliuttup kukkunersiuinermut ataatsimiititaliamut ilaasortaatitaa uparuaavoq.

Agathe Fontain isumaqarpoq, Aleqa Hammondip oqaasii inuiaqatigiinnut innimiilliornerusut nassuernermillu kinguneqartariaqaraluartut, nangillunilu:

- Inuiaqatigiit ikittunnguugatta ingammik ileqqorissaarnermik qaffasissumik ingerlatsisariaqarpugut.

Aleqa Hammondip atornerluinera tusagassiuutini arlalippassuariarluni allaaserineqartarsimavoq.

Powered by Labrador CMS