Friday, September 15, 2017 - 11:39

Atornerluineq pillugu suliami allagaq Islandip naalakkersuisuinik uppititsisoq

Assi.: Privat
Kinguaassiuutitigut atornerluineq pillugu suliamik toqqorterinermik unnerluussinerup Islandimi naalakkersuisoqatigiit avissaartuutsippai

Partiip Lys Fremtidip ministeriunerup Bjarni Benediktssonip naalakkersuisui qimammagit, Islandip naalakkersuisui unnuaq avissaarput. Lys Fremtifip ministeriuneq  tatiginnikkunnaarlugu oqaatigaa. Iceland Monitor taama allappoq.

Naalakkersuisoqatigiit pingasuusut Uafhængighedspartiet, Reformpartiet aamma Lys Fremtid avissaarnerisa kingorna, qinersisoqarneranit kingullermit ukioq ataaseq qaangiutinngitsoq qinerseqqittoqarniarpasippoq.

Ministeriunerup partiiata Uafhængighedspartiip Bjarni Benediktssonip angutaata, Benedikt Sveinssonip, allagaa toqqorterniarsarigaluarmassuk Lys Fremtid naalakkersuisoqataajunnaarpoq. Taassuma ikinngutini meeqqanik kinguaassiuutitigut atornerluisimasoq pineqaatissinneqarsimannginnermut uppernarsaataa iluarsiniarlugu ikiorsimavaa.

Inatsisinik atuutitsinermut naalakkersuisup Sigridur Andersenip Uafhængighedspartimeersup allagaq juulimili oqaluttuaraa. Kisianni naalakkersuisut allagaq saqqummiussimanngilaat, aatsaallu inatsisartuni ataatsimiititaliap piumasarimmagu saqqummiullugu.

Sveinsonip allakkamini kajumissaarutigaa, ikinngutaata Hjalti Sigurjón Haukssonip 'ataqqinassutsini' uterteqqissagaa. Taanna 2004-mi ukiut 12-it ingerlanerini panissiani tallimanilli ukioqartoq atornerluttarsimaneranut pineqaatissinneqarpoq.

Tamanna Islandimi inatsimmit akerleriissutaasumit tunuliaqutitaqarpoq, tassami ingasattumik pinerluutigisimasamut pillaatigineqartoq naammassisimagaanni, pineqqaatissinneqarsimannginnermut uppernarsaateqartoqalersinnaammat.

Guðlaug Kristjánsdóttir, Lys Fremtidimi siulittaasup suliaq 'akuersaagassaanngitsusoq' Iceland Monitorimut oqaatigaa.

Naalakkersuisoqatigiinni partiit pingajuat, Reformpartiet, qinerseqqittoqarnissaanik kajumissaaruteqarpoq.

Seneste nyheder / Nutaarsiassat kingulliit