Atorfillit Kattuffiat sulisut inatsisitigut illersugaanerat pillugu ernumassuteqartoq

- Ilaasortanik sullissinitsinni suliani amerligaluttuinnartuni naammattoortarparput sulisitsisut sulisuminnut tunngatillugu tunngaviusumik malitassat atuuttut eqqortinneq ajoraat.

Atorfillit Kattuffianni siulittaasoq Dina Olsen tusagassiutinut nalunaarummi oqarpoq.

Atorfillit Kattuffiat, Kalaallit Nunaanni sulisunut kattuffiusoq tjenestemanditut atorfillit isumaqatigiissutillu malillugit akissarsiallit ilinniagartuujunngitsut, 1000 missaaniittunik ilaasortaqartoq sulisut inatsisitigut illersugaanerat pillugu ernumassuteqarpoq.

Tamakku tunngaviusumik malitassat annermik ajornartorsiutaasarput soraarsitsisoqalersillugu, isumaqatigiissutit qanoq nassuiartariaqarnerini isumaqatigiinngittoqartillugu aammalu aningaasarsiat pillugit isumaqatigiissutinut tunngasuni, Dina Olsen nalunaaruteqarpoq.

Aalajangiisoqalersillugu sulisitsisut sulisut tusarniaqqaartanngikkaat suliani amerliartortuni Atorfillit Kattuffiata naammattoortarpai. Imaluunniit sukumiisumik misissueqqaarnatik suliat suliarineqartartut.

Ernumanartoqartoq
- Assut ernumanartoqarpoq aningaasarliornerit sipaarniarnerillu kingunerissappassuk inunni sullissinermi malitassat, isumaqatiginninniarnerni suleqatigiinnermilu pissutsinut malitassat eqquutitinneqartanngippata, Atorfillit Kattuffianni siulittaasoq Dina Olsen oqarpoq nangillunulu:

- Pingaaruteqarpoq aamma sulisitsisunit paasineqassasoq sulisunut tunngatillugu suliaqarnermi pitsaassutsip naammaginartuunissaa.

Atorfillit Kattuffiata neriuutigaa ajornartorsiutit tamakkua tamanit eqqumaffigineqarlutik sammineqalernissaat. Pissutsit taamaattut atuutiinnassappata kingunerisassavaa suliat eqqartuussivikkut isumaqatigiissitsiniarnikkullu ingerlasarnissaat pissutsillu taamaannerisa pisortat suliffeqarfiini sulisunik piukkunnaatilinnik sulilersitsiniarnissaq ajornakusoornerulersissavaa.