Sinniisoqarfik

Atorfik qaffasissoq pillugu oqallinneq killeqartariaqartoq Kuupik Kleistimit kissaatigineqarpoq

Namminersorlutik Oqartussat Danmarkimi sinniisoqarfianni pisortassatut atorfinitsinneqannginnini Kuupik Kleistip ataqqivaa

- Nalugaluarpara aalajangiiniarnermi periutsit qanoq ittut atorneqarsimanersut, kisianni uanga atorfinitsinneqannginnera pillugu naammagittaalliuteqanngilanga aamma qinnuteqarsimasut akornanni toqqaaneq soorunami ataqqivara, Kuupik Kleist oqarpoq

- Namminersorlutik Oqartussat Danmarkimi sinniisoqarfianni pisortassatut qinnuteqarsimanerma tamatumalu kingorna atorfinitsitsinerup annertuumik nuanninngitsumillu ingerlanneqalernera neriuppunga tamaannga killeqassasoq.

Naalakkersuisunut siulittaasuusimasoq Kuupik Kleist tusagassiutinut nalunaaruteqarpoq.

Tassani Atuagagdliutini uani sapaatip akunnerani saqqummersumi eqqartorneqarpoq. Tassani ilaatigut allaaserineqarpoq Kuupik Kleist, Inuit Ataqatigiit, qinnuteqartullu allat 19-it atorfimmut qinnuteqarsimagaluarnerat. Kalaallit Nunaata Sinniisoqarfiani Aviâja Helms atorfinitsinneqarpoq. Kalaallit Nunaata Sinniisoqarfiani atorfeqassagaanni ilaatigut piumasaqaatigineqarpoq 'ukiuni pingasunit tallimat tikillugit atorfimmi pisortatut misilittagaqareersimanissaq imaluunniit politikkikkut aalajangiisuusumik ukiuni tallimani aalajangeeqataasarsimanermut misilittagaqarsimanissaq'. Tassungalu atorfimmut Aviâja Helmsip misilittagai piumasaqaatigineqartunut naleqqutinngillat.

- Uanga allatuulli periarfissaq atorlugu atorfimmut qinnuteqarpunga, qinnuteqartutullu allatuulli atorfinitsitsisarnermut ataatsimiititaliamit oqaloqatigineqarpunga nalilersuiffigineqarlungalu. Manna tikillugu apersorniarneqartarninnut tamanut naameernikuuvunga aamma matuma kingorna tamanna pillugu oqaaseqaqqinnavianngilanga, Kuupik Kleist nassuiaavoq.

- Nalugaluarpara aalajangiiniarnermi periutsit qanoq ittut atorneqarsimanersut, kisianni uanga atorfinitsinneqannginnera pillugu naammagittaalliuteqanngilanga aamma qinnuteqarsimasut akornanni toqqaaneq soorunami ataqqivara.

Massakkut allaat aviisit (Sermitsiaq.AG-ip aamma allaaserereerpaa) ilaata 'taasisitsiniarnera' isumaqarpunga killissamik qaangiinerusoq, atorfinitsitsineq qanorluunniit isumaqarfigigaluaraanni. Uannut iluaalliuutaavoq aamma qularutiginngilara atorfinitsinneqartussatut toqqarneqartumut, qinnuteqartunullu allanut, taamaassasoq.

- Taamaattumik kissaatigaara pineqartoq pillugu tusagassiorfitsigut eqqartuilernersuaq tamaannga killeqassasoq. Soorunami naalakkersuinikkut iliuutsit tamatigut isornartorsiorneqarsinnaasariaqarput – kisianni aamma inunnut ataasiakkaanut tunngasut killeqartariaqarput. Taamaattumik matumuuna kajumissaarutiga saqqummiuppara, Kuupik Kleist tusagassiutinut nalunaarummi oqarpoq.

AG ataani pisiarineqarsinnaavoq:

Powered by Labrador CMS