Folketingimut qinersineq
Atlantikup avannaanit qinigaasussat qitiusumik inissisimassasut
Saamerliit talerperliilluunniit naalakkersuisuutitaqalernissamut naammattunik ilaasortaatitaqalinnginnissaat taasereersunik isumasiuinermi takutinneqarpoq
Danmarks Radio taasereersunik isumasiuinermut tunuliaqutaavoq,
V siuarsimanerulaartoq
Isumasiuinermi taasinerit 49,1 procentii Socialdemokratineersumut Helle Thorning Schmidtimut tapersiissutigineqarput 50,9 procentiilu partiinut unammillertimut Lars Løkke Rasmussenimut Venstremeersumut tapersiissutigineqarlutik.
Qinersineq taama inerneqartoq talerperliit 89-inik ilaasortanngortitsinerannik saamerliillu 86-inik ilaasortanngortitsinerannik isumaqassaaq.
Amerlanerussuteqartoqanngitsoq
Taamaalillutik ministeriuninngorniuttut taakkua marluk arlaannaalluunniit ilaasortanngortitassanik pisariaqartunik 90-inik pissarsisinnaassanngillat. Taamaattoqassappallu ilaasortanngortussat Atlantikup avannaaneersut sisamat, Kalaallit Nunaannit marluk Savalimmiunillu marluk, qinersinerup qanoq inerneqarnissaanut aalajangiisunngussapput.
Tamatumani saamerliit qinigaaffimmi qaangiuttumi Siumumit Inuit Ataqatigiinnillu Savalimmiunillu qinigaasumik tapersersorteqarput, talerperliillu Savalimmiunit qinikkamik tapersersorteqarlutik.
Qinersinerup kingorna
Isumasiuineq Epinionimit suliarineqarpoq qallunaallu taasisinnaatitaasut 4.524-t qinersinermi taasisut akissutaannik tunngaveqarluni. Isumasiuinerit taama ittut qinersineq sioqqullugu isumasiuinernit tutsuiginarnerusutut naatsorsuunneqartarput.
Taasereernerup kingorna isumasiuineq Danmarkimi qinersiviit Danmarkip nalunaaqutaa naapertorlugu nal. 20.00 matunerat nalerorlugu tamanut saqqummiunneqarpoq.