assit takukkit
Atlantikup Avannaamiut Illuat Odensemiittoq aallartilluartoq
Odensep sissiugaata eqqaani illorsuaq ukiup affaata missaani ammareersoq inunnit takuniarneqarluarsimavoq
Atlantikup Avannaamiut Illuat Odensemiittoq novembarip qulingiluaanni ammarpoq. Ammarneranit ukiup affaa qaangiutereersoq inuppassuarnit iserfigineqareersimavoq, saqqummersitsinerit nutaat takkuttuarput kiisalu neriniartarfik Restaurant Nordatlanten ornigarneqarluartarluni.
Illorsuup ukiup affaa ammareersoq ulapaarfiulluarsimasoq Atlantikup Avannaamiut Illuanni pisortap Kirsten Mærskip Sermitsiaq.AG-mut oqaatigaa.
- Maannakkut pitsaanerujussuarmik illorsuaqalernikuuvugut. Naleqquttumik allaffeqalernikuuvoq, suliniaqatigiiffiit assigiinngitsunit illorsuaq atorluarneqarpoq, kalaallit peqatigiiffii soorlu Umiaq Avalallu illorsuaq atorluartarlugu. Aamma init attartorneqarsinnaasut attartorneqallattaartuaannarput.
- Ilinniartut ineqarfii aamma atorneqarluarput, maannakkut kalaallit 17-nit najugaqarlutik.
- Illorsuup ammannginnerani naatsorsuutigineqartut annertusimapput, oqarsinnaavungalu naatsorsuutit piviusunngorsimasut, Kirsten Mærsk oqarpoq.
Pisussat
Illorsuarmi erinarsortartoq Simon Lynge maajip 20-ni tusarnaartitsissaaq, nuuteeraliaa 'Absence of Fear' tusarnaartitsissutigissallugu.
Unnummi tassani kalaallit nerisassaataat assigiinngitsut nerineqarsinnaassapput. Odensemi sissikkami maajip 30-ani festivaleqartoqassaaq. Naalakkersuisut siulittaasuat Aleqa Hammond juunip 14-ani illorsuarmut pulaassaaq, tassungalu atatillugu kaffillertoqassalluni. Dronning Margrethe prins Henrillu juunip 19-ani pulaassapput, umiarsuarmik angalanerminni atatillugu tikeraassallutik.
Soorunami aamma kalaallit ullorsiornerat aamma malunnartinneqassaaq.