Suleqatigiikkunnaarneq
Atassutip Siumumik Qeqqani suleqateqarnini unitsippaa
Atassut Qeqqata Kommuniani illuatungiliuttunngorpoq Siumup amerlanerussuteqarluni Atassup ataatsimiisitaliaq siulittaasuuffigisaa Siumup nunaqarfimmiumik siulittaasoqaqqunagu tigoreeraalu
Siumut Qeqqata Kommuniani nunaqarfimmiumik kommuunip ataatsimiisitaliaani arfinilinni siulittaasuutitaqarusunngilaq.
Taama Siumup, februaarip 27-ata tungaanut Qeqqata Kommuniani kommunalbestyrelsimi suleqataa Atassut isumaqarpoq, partiit taakkua marluk isumaqatigiissutaat naapertorlugu Atassutip ilaqutariinnermut ataatsimiisitaliaq siulittaasuuffigisaa, Siumup isumaqatigiissutaasoq avaqqullugu siulittaasuuffigilermagu.
Atassutillu taamatut naliliinera Siumup gruppeata siulittaasuanit uppernarsarneqarpoq.
Siumut Atassullu suleqatigiinnissaminnut isumaqatigiissutiminni isumaqatigiissutigisimavaat Atassutip kommuunip ataatsimiisitaliaani ataavartuni arfinilinni ataaseq siulittaasuuffigissagaa.
Kisianni tamanna atorunnaariasaarpoq Atassutip kommunalbestyrelsimi ilaasortaatitaata, Mette Sofie Lerchip, aamma ilaqutariinnermut ataatsimiisitaliami siulittaasuusimasup, kommunemut allamut nuulluni kommunalbestyrelsimi sulinngiffeqalermat. Ilaqutariinnermummi ataatsimiisitaliami ilaasortat amerlanerussuteqartut Siumumeersoq politikeri siulittaasussatut toqqarpaat, Atassummut isumaqatigiissut unioqqutillugu.
Atassut nassuiaavoq
- Siulittaasuutitaqarneq Kangaamiunut inissinniarneqalermat, tamanna Siumumit ajorineqarluni unitsinneqarpoq. Siulittaasup nunaqarfimmiinnissaa Siumumiit inooqataaffigineqarsinnaanngitsoq taasinerup inernerata uppernarsarpaa, taama Atassummeersoq Tønnes Kreutzmann, Kangaamiuni najugaqartoq, Qeqqatalu Kommuniani ilaqutariinnermullu ataatsimiisitaliami Siumut Atassutillu isumaqatigiissutaat naapertorlugu siulittaasunngortussaangaluartoq taama allappoq.
Tønnes Kreutzmann nangippoq:
- Pisoq politikkikkut assigiinngitsunik oqallisigineqarsinnaavoq, qimarratiginiarneqassanngilarli isumaqatigiissut unioqqutinneqarmat aamma sumiissusersior-toqarlunilu inuttarsiuisoqarmat.
Siumut uppernarsaavoq
Qeqqata Kommuniani Siumup politikkikkut gruppemi siulittaasuata, Jakob Olsenip, Sermitsiaq.AG-mut uppernarsarpaa Siumup pingaartissimagaa ilaqutariinnermut ataatsimiisitaliami Maniitsumi Sisimiuniluunniit najugaqartariaqarnera.
- Nalilerparput pitsaanerussasoq siulittaasoq Maniitsumi imaluunniit Sisimiuni najugaqarpat, illoqarfinni taakkunani suliassat amerlanerummata, Jakob Olsen oqarpoq.
Siumumeersoq Alfred Olsen ilaqutariinnermut ataatsimiisitaliami siulittaasunngorpoq. Jakob Olsenilu nassuiaavoq ataatsimiisitaliamit aamma pingaartinneqarsimasoq siulittaasup allaffissornermik suliaqartunik qanimut suleqateqarsinnaanera.
Qeqqata Kommuniani Siumut amerlanerussuteqarluni kommunalbestyrelsimi qulinik ilaasortaatitaqarpoq, Atassut pingasunik ilaasortaatitaqartoq. Inuit Ataqatigiit aamma Partii Naleraq tamarmik ataatsimik ilaasortaatitaqarput.
Siumup gruppiata siulittaasuata ilanngullugu aamma oqaluttuaraa, Siumup ilaasortaatitaasa ilaqutariinnermi ataatsimiisitaliami siulittaasussamik qinersineq tusaatissatut tigusimagaat. Aamma taassuma eqqaavaa Siumup partiit allat saaffiginnissappata oqaloqatiginissaat ammaffigigaa.