qinersineq
Atassutip siulittaasuata Siumut IA-lu naveerpai
Siumup Inuit Ataqatigiillu aaqqiagiinngissuteqarnerat pissutaalluni Kalaallit Nunaata aningaasaqarneranut pisooqataalluinnartut partiimi siulittaasoq Knud Kristiansen oqarpoq
- Atassut sinnerlugu eqqaasitsilaassaanga; inuiaqatigiittut suli annertunerusumik ineriartorfigisassaraluatsinni partiit saamerlertut imminnut isigisut Inuit Ataqatigiit Siumullu akunnerminni pissaaneqarniunnerat, aporaattarnerat naalakkersuinikkullu apeqqutini pingaarutilinni naapiffeqanngilluinnarnerat pissutaalluni nunarput kinguarsarneqartuarsinnarpoq.
Atassutip siulittaasua Knud Kristiansen tusagassiutinut nalunaarummi oqarpoq. Tusagassiutinut nalunaatut ima qulequtaqarpoq: 'Naalakkersuinikkut aqutsineq patajaatsoq kiffaanngissutsimik tunngaveqartariaqarpoq'.
Knud Kristiansenip qinersisartunut neqeroorutigai patajaassuseq, aalajaassuseq aammalu tunniusimalluni suliumassuseq minnerunngitsumillu anguniakkat assigiinngittaraluartut naaperiaarusussuseqarneq qulakkeerneqassasut.
Aaqqissuusseqqinnerit politikkillullu isumaqatigiiissuteqarnerit
- Atassummit pingaartilluinnarparput sulissutigissallugulu siunissamut qaninnerusumut aammalu ungasinnerusumut inuiaqatigiinnut iluaqutaanerpaasussat anguniarlugit partiit akornanni isumaqatigiissuteqartoqarneratigut suliassaqarfinni inuiaqatigiinnut pingaaruteqarluinnartuni aaqqissuusseqqinnerit naatsorsuutigineqarsinnaasut tunngavigalugit ingerlasoqalernissaa, Knud Kristiansen oqarpoq.
Sapinngisamik nunatta karsiata isertitai aningaasartuutillu oqimaaqatigiittariaqartut Knud Kristiansen oqarpoq:
- Taamaattorli Atassut siunissamut aningaasaliissutinut nangianngilaq aamma suliassanut angisoorsuarnut avataaniit aningaasaliisoqarsinnaanera ammaffigaarput. Inunnut akileraartitseriaaseq ullumikkut atuuttoq attatiinnarneqartariaqarpoq, pisariitsuuvoq naapertuilluarlunilu. Ingerlatseqatigiiffiit akileraarutaat (selskabsskat) suli apparneqartariaqarpoq inuussutissarsiutinut aningaasaliiumasunut pilerinartunngortillugu.