Atassut
Atassutip siulittaasua: - Suli taamaatinngerujussuarpugut
Mala Høy Kukop partiip siulittaasua oqaloqatigalugu paasissutissiinani partiimut ilaasortaajunnaarnera, Atassutip nuna tamakkerlugu siulittaasuata Siverth K. Heilmannip pakatsissutigisorujussuuaa. Kisianni partii suli piuvoq, aappaagulu Inatsisartunut qinersisoqarnissaanut qilanaarput.
Mala Høy Kuko partiip siulittaasuanut Siverth K. Heilmannimut sisamanngornermi nalunaaqutaq 10.36 emailikkut allappoq, tassanilu attaviitsunngornissani nalunaarutigaa.
Tapersersuineq
- Pingasunngormat oqarasuaatikkut oqaloqatigiippugut, tassanilu oqaatiginngilaa. Politikkikkullu sulinermi tapersersorlugulu piffissaq annertooq atornera eqqarsaatigigaanni, taava oqaloqatigalunga aalajangernini nalunaarutigisinnaanngimmagu pakatsisorujussuuvunga, Siverth K. Heilmann Sermitsiaq.AG-mut oqarpoq.
Partiimi siulittaasup taamaalilluni Inatsisartunut ilaasortaatitatuani annaavaa, partiillu siunissaqannginnerarlugu ilismasuttoqarpoq. Siverth K. Heilmannip tamanna sakkortuumik akerlilerpaa.
- Puigussanngilat sinerissami kommunalbestyrelsinut ilaasortaatitarpassuaqaratta. Taamaatinngilagut. Taamaanngiivippoq. Aamma aappaagu Inatsisartunut qinersinissamut qilanaarpugut, Atassutip siulittaasua naqissusiivoq.
Ilaasortat qulingiluat
Mala Høy Kukop ilaasortaajunnaarnerata kingorna Atassut kommunalbestyrelsini qulingiluanik ilaasortaatitaqarpoq.
Mala Høy Kukop attaviitsunngorniarluni aalajangernera, partiimik immikkut ittumik siulersuisunik ataatsimiititsinissamik aalajangiussaqartinngilaa.
- Partiip siulersuuneri ataasinngormat ataatsimiipput. Partiimit ilaasortarpassuarnit qanoq pisoqarneranik paasinninngitsunit saaffigineqaqattaarpunga. Oqarsinnaavunga qineqqusaarnissamut qilanaarluta, pitsaasumik politikkeqarnerput pissutigalugu, partiimi siulittaasoq Maniitsumeersoq oqarpoq.
Aamma atuaruk: Atassutip Inatsisartunut ilaasortatuani annaavaa