Lyngep tunuarnera
Atassutip siulittaasua Lyngep tunuarnera pillugu: Uggornartorujussuuvoq
Siverth K. Heilmannip, Atassummi siulittaasup, Steen Lyngep partiimit tunuarnera uggoraa. Atassutip Inuusuttaanik isumaqatigiinngissuteqarneq ajornartorsiutit ilagisinnaavaat.
Steen Lynge Atassummnut ilaasortaajunnaarpoq, tamannalu partiip siulittaasuata Siverth K. Heilmannip uggoraa.
Aamma atuaruk: Steen Lynge Atassummi ilaasortaajunnaartoq
- Uggornartorujussuuvoq. Suleqatigilluarnikuuara. Steen (Lynge, aaqq.) ukiuni arlalinni suleqatiginikuuaara, tamannalu nammineq aalajangigaraa, Siverth K. Heilmann Sermitsiaq.AG-mut oqarpoq.
Steen Lyngep ullumikkut tunuarnera siulittaasumut tupaallaataanngilaq.
- SMS-ikkut sisamanngormat allaffigaanga, tamannalu soorunami ajuusaarutigaara, Siverth K. Heilmann oqaluttuarpoq.
Atassutip Inuusuttaanik isumaqateqannginneq
Partiip naleqartitaanik assigiunnaarneranik ilaasortaajunnaarneq pissuteqartoq, Steen Lynge Facebookimini allappoq.
Partiimi siulittaasup Steen Lyngep ilaasortaajunnaarneranut pissutaasumik erseqqissimik oqaaseqarnissani kissaatiginngilaa.
Taassumali Atassutip Inuusuttaanik isumaqateqannginneq oqaatigaa.
- Taassuma (Steen Lynge, aaqq.) siornatigut Atassutip Inuusuttaasa oqaaseqaataasa ilai isumaqataaffiginagit oqaatiginikuuaa. Sammineqartut amerlanngitsut pillugit aaqqiagiinngissuteqarfiginikuuai. Kisianni ersarinnerusumik oqaatigerusunngilakka, Siverth K. Heilmann oqarpoq, tamatuma saniatigut partii ajornartorsiorsorinnginnerarpaa.
- Naagga, naagga ajornartorsiunngilagut.
Aamma atuaruk: Siverth K. Heilmann: Qinersisartut nuannaarivaannga