Aalisarneq
Atassutip saarullinnut qaleralinnullu pisassiissutit qaffatsinniarpaat
Partii naalakkersuisoqataasoq ukioq manna saniatigut pisassiissuteqaqqusivoq, pisassiissutinillu amerlanerusunik piumasaqarluni
Ukioq manna saarullinnik pisassiissutit nungummata, siullermik Siumut saniatigut pisassiisoqarnissaanik noqqaassutieqarpoq.
Naalakkersuisoqataasorlu maanna Atassut saarullinnik qaleralinnillu pisassiissutit amerlineqarnissaannik piumasaqarpoq. Tamanna ukioq manna siunissamilu atuutissaaq.
Atuaruk: Saarullinniarneq pingasunngorpat unissaaq
- Saarullippassuit takkukkaluttuinnarfiini, tunitsivitsigullu killilerujussuarmik atugassaqartitsisoqaraluartoq aalisartut nunamilu suliffissaqartitsilluartut, aalisagartassat nungunneqarneri piinnarlugit uninngatitsisoqarsinnaanngilaq, Siverth K. Heilmann (A) tusagassiuutinut nalunaarummi allappoq.
Ukiormanna saarullittassiissutit biologit Pinngortitaleriffimmit innersuussinerannit marloriaataapput.
Atuaruk: Siumup saarullittassiissutit qaffatseqquai
A: Qalerallit nungulinngillat
Qalerallillu amerlassusaannut tunngatillugu, biologit uniuilluinnartut Siverth K. Heilmann isumaqarpoq.
- Atassummiit kingumut ersarissaqqikkusupparput, qaleraleqarfinni qaleralittassat uumasorsiuuniik appartikkusunneqartuaraluartut, ukiumut pisassiissutit tunitsivitsigut atugassaritinneqartut pitsaanngikkaluaqisut nungunneqartuarneri takornartaanngilaq, peqassuseq annikilliartunngilaq, Siverth K. Heilmann, pisassiissutit malunnaatilimmik qaffanneqarnissaanik isumaqartoq allappoq.