eqqaaniut
Atassutip Otto Steenholdt eqqaaniarpaa
Knud Kristiansen: Ataatamma oqaluttuatsialannik oqaluttuuttarnikuuaanga. Kingornalu Ottop nammineq aamma oqaluttuuttarnikuuaanga.
Otto Steenholdtimut Atassutip siulittaasuata Knud Kristiansenip eqqaaniutaa:
Ukiorpassuarni nunatta Landsråd-ni, Namminersornerullutillu Oqartussat eqqunneqarneraniit Inatsisartuni ilaasortaasimasoq, kiisalu ukiuni 21-ni Folketing-mi Atassut sinnerlugu ataannartumik ilaasortaasimasoq, taamaasilluni Kalaallit Nunaata oqaluttuarisaanerani sivisunerpaamik Folketing-mi ilaasortaalluni, aliasuutigisatsinnik akornatsinniikkunnaarpoq. Otto septemberimi 80-nik ukioqalerluni inuuissiorpoq.
Otto qinikkatut sulinermini ilisarnaqutiginerpaasimavaa, kalaaliviunini. Oqaluttariaasia ersarissoq, aammalu ilisimasaqarluarluni saqqummertarnerata tatiginassuseq annertooq pigisarpaa. Piniartukkormiunit kingoqqisoq avatangiiseeqartorlu ilisarnaatigisarpaa. Inuttut qanilaartuuvoq, oqaluttuarnermik nuannarisalik, aammalu illarnermik ikingutikkumartumillu pissuseqarneq ileqqoralugu.
Anguniagaqallaqqissuuvoq, tunniutiinnajuinninnilu assorsuaq nukittoqutigisarpaa. Nunatta ilisimaarilluarnera, inuppassuillu attaveqarfigisarneranni ilisimasai pissutsinullu malinnaanera nuannaartorinartartuuvoq.
Otto-p partii Atassut pilersitseqataaffigaa, taamaasilluni nunatsinni allanngulerfiup nalaani oqaluttuarisaanermi pingaarnerit ilaat, nutaaliaasumullu ikaarsaarneq annertoqisumik aqqutissiuueqataaffigaa.
Nammineq uanga meeraallungali, Otto nuannaartorisavissuama ilagaat. Angut nunatsinnut ernerulluartoq. Kulturitsinnik attassisoq, piniartukkormiunillu pingaartitsisoq. Pinngortamik atuisoq, piniarnermik aallutalik, imminullu tatigigaarluni qunussuteqarani oqaaseqartartoq, inussiarnersoq, illarumatooq, inuppalaartoq. Ataatama Knud Kristiansen-ip Landråd-mi suleqatitoqaa, oqaluttuat nuannersut tusartarpakka, kingorna aamma Otto-mit. Kingornalu nammineq qinikkatut suleqatigillatsiarnera aamma immikkut nuannersutut eqqaamasaqarfigaara.
Otto-p ukiorpassuarni nunatsinnut kiffartorluarneranut atatillugu Dronningens ridderkors 1 grad, aamma Nersornaat sølvi, guld-lu saqqarmiunik nersornaateqarpoq.
Otto-p nulia, qitornai, ilaqutaalu qamannga pisumik misiginneqatigaakka.
Otto-p eqqaaneqarnera ataqqinartuassaaq.
Knud Kristiansen
Siulittaasoq