taasisinnaatitaaneq

Atassutip Inuusuttai: Taasisinnaanermut ukiup appartinneqarnera illersorneqarsinnaanngilaq

Taasisinnaatitaanerup ukiunut 16-inut appartinneqarnissaanik IA-p siunnersuutaa Atassutip Inuusuttaanni politikerit akerleraat. Pitsaaneruvoq kørekortitaarsinnaalersikkaanni

Atassutip Inuusuttaasa siulittaasuat Masauna Peary

Inuit Ataqatigiit ukiakkut ataatsimiinnissamut taasisinnaatitaanerup appartinneqarnissaanik siunnersuutaa akerlileqqinneqarpoq. Atassutip Inuusuttaasa Siumup inuussuttai assigalugit siunnersuut akerleraat.

– Atassutip Inuusuttai isumaqarput taasisinnaatitaanerup appartinneqarnissaa illersorneqarsinnaanngitsoq, tassa FN-ip malittarisassai malillugit inuusuttut 18-it inorlugit ukiullit meeraapput, Atassutip Inuusuttaasa siulittaasua Masauna Peary tusagassiorfinnut nalunaarutikkut allappoq.

Sunnertiasut

Atassutip inuusuttaasa apeqquserpaat inuusuttut 16-inik ukiullit namminneq isumartik malillugu taasisinnaanersut tikkuarlugulu inuusuttut sunnertiasuusut.

– Qularaarput meeraq Inatsisartunut kommunalbestyrelsimullu qinersisinnaassasoq. Pissutigalugu angajoqqaaminnit, ikinngutiminnit allanillu aalajangersimasumik taasinissaminnut sunnerneqarsinnaagamik ´atornerlunneqarsinnaallutillu´, Masauna Peary allappoq.

Taassuma ilanngullugu tikkuarpaa inuusuttorpassuit 18-it sinnerlugit ukiullit politikkimut malinnaanngitsut, taamaattumillu tamanna ilisimasaqarfiginagu. Taamaattumik ikinngutimik taasaannik taasisarput.

Atassutip Inuusuttaasa erseqqissarpaat inuusuttunut tamakkununnga periarfissaasinnaasut allat oqaluusererusunnerullugit, assersuutigalugu 16-inik ukiullit kørekortitaarsinnaalernissaat.

Soqutiginninnerulersillugit

Atassummi politikerit inuusuttut taasinissamik soqutiginninneq annertusarusuppaat, siullermilli politikerit iluameernerulertariaqarput, Inatsisartullu ataatsimiittarfianni akeqqisaarnerit pisuutitseqattaarnerillu unitsillugit.

– Isumaqarpugut ´torinngitsumik´ oqallinnerit pissutigalugit qinersinerni taaserusunneq nungusartaraat, Atassutip Inuusuttaasa siulittaasuat Masauna Peary oqarpoq.

Taassuma tikkuarpaa pingaartumik partiit anginerit marluk, Inuit Ataqatigiit Siumullu, ukiuni kingullerni Inatsisartuni tusagassiorfitsigullu akeqqersimaartumik pissusilersortartut.

Powered by Labrador CMS