Atassut: Ikummatissat akiat qaffariartorpallaaqaat

Ikummatissanut akit tallimanngornermi aggustip aallaqqaataanit atuutilersumik nuna tamakkerlugu qaffatsinneqarnerat Atassutip akerleraa.
Akit qaffatsinneqarnerisigut diesel aamma gasuulia 54 øre-mik akisunerulerlutik liilterimut 6,11 koruuniniit 6,65 koruuninut qaffapput, benzinalu 39 øremik akisunerulerluni liiterimut 6,11 koruuniniit 6,50 koruuninut qaffappoq, petroliullu akia 55 øremik qaffariarluni 6,21 køoruuniniit 6,76 koruuninut qaffappoq. Akinutd ilaavoq avatangiisinut akitsuut 10 øre.
– Pingaartumik isumakuluutigaarput ikummatissanik akitsuineq taamaattoq inuiaqatigiinni equngasumik eqquissasoq, pingaartumik nunaqarfinni illoqarfinnilu avinngarusimasuni najugaqartut akornanni isertitakinnerit annertunerpaamik eqqorneqassasut aarleqqutigaarput, taakkumi angerlarsimaffiisa amerlanersaat uulia atorlugu kiassarneqarput. Tamatuma saniatigut aalisartut piniartullu eqqornerlunneqassasut aarleqqutigaarput, taakkumi ulluinnarni aningaasatigut imaannaanngitsunik atugaqarlutik inuussutissarsiumminnik ingerlatsipput, annikigisassaanngitsumillu eqqugaanissaaat isumakulunnarpoq, Inatsisartunut ilaasortat Knud Kristiansen aamma partiip siulittaasua Gerhardt Petersen, Atassut, nassuiaapput.
Taakku Naalakkersuisunut paragraf 37 naapertorlugu apeqquteqarput, apeqqutigalugu akit qaffariarneri pineqartut Naalakkersuisut qanoq isumaqarfigineraat.
Ilanngullugu paaserusuppaat Naalakkersuisut Polaroil-imik piginnittutut akulerussimasinnaagaluarsimanersut akillu qaffatsinneqarnissaat pinngitsoortillugu, taarsiiullugulu ingerlatsivimmut piumasaralugu sipaarniuteqassasoq.
Atassutip aamma paaserusuppaa Naalakkersuisut akulerukkusunnersut akillu siusinnerusumut apparteqqinneqarnissaat piumasaralugu.
Kiisalu partiip paaserusuppaa Polaroil-ip suliffeqarfissuup KNI-p sinneranit aningaasatigut mangiarneqannginnissaa Naalakkersuisut sulissutigerusunneraat.
– Isumaqarpugut tassani ingerlatsinerup ersarinnerulernissaa kisiat pissarsiarineqaannassanngitsoq, aammali Polaroilip ingerlatsinerminut aammalu atortuutiminut peqqumaasivimminullu aserfallatsaaliinermut aningaasatigut matussutissaqarnissaa qulakkeerneqarsinnaassasoq, Knud Kristiansen aamma Gerhardt Petersen apeqqumminnut atatillugu oqarput.
Taakkua qilanaaraat KNI A/S-ip siunissami periusissaanik misissuinermik, aammalu KNI-p Polar Oil-illu selskabinut namminersortunut avinneqarneratigut iluaqutissanut ajoqutissanullu Naalakkersuisut misissuinissaat.