Atassut ukiuni 40-nngortorsiorluni nalliuttorsiorpoq
Atassut 1978-imi partiitut pilersinneqarsimasoq, ukiuni kingullerni unammilligassaqartaraluarluni maanna inuusuttunik ilaasortaqarluarleriartormat, siulittaasup tulliata nuannaarutigaa.
Atassut partiitut ukiuni kingullerni nukittoriartuinnartutut, siulittaasup tulliata tusagassiutinut nalunaarummi nalilerpaa.
- Atassut ukiut 40-ni nunatsinni politikkimik annertuumik sunniuteqarluarnikuuvoq ulloq manna tikillugu, nunarpullu sineriassuani atassut immikkoortortaqarfippassuaqarpoq ingerlalluartunik qinersisoqarnerani nunaqarfinnut aqutsisunut, kommuninut, inatsisartunillu immikkoortortaqarfiit sassartitsilluartarput taamaalillutalu suleqatigiilluarsinnaaneq nukiit annertuut pigisagut suli nukittoqqutingaagut, Atassummi siulittaasup tullia, Qulutannguaq Berthelsen, tusagassiutinut nalunaaruteqarluni allappoq.
Partiip iluani kinguaariit nikikkiartortut
Partiip pilersinneqarneraniit maannamut siuttuusimasut partiip qujassutissaqarfigigai, siulittaasup tullia allappoq. Ukiuni kingullernili kinguaariit nikikkiartornerani inuusuttut partiimi ilaasortaasalernerat aamma nuannaarutigalugu.
- Atassummi ilaasortat kinguaariit nikikkiartorput, inuusuttut amerliartuinnavippugut, akisussaaffimmik tingusinissatsinnut piareersarneq ingerlapparput piumassuseqaqaagullu inuiaqatigiinni kinguaarit nikinnissaanut sulissalluta, Atassummi ilaasortagut misilittagartuut soorunami pinngitsoorsinnaanngilagut suleqatigilluarnissaat, Qulutannguaq Berthelsen naqissusiivoq.
Atugarissaarnermi atugarliornermilu
Atassutip partiitut ilungersunartorsiorsimanera, Qulutannguaq Berthelsenip nassuerutigaa. Inatsisartunummi qinersinissamut kinngullermut sassartitaqarumallutik, Atassut atsiornernik katersisariaqarsimavoq. Katersisariaqalerneq partiip inatsisartunut ilaasortaatitaasa qinigaaffimmi kingullermi partiinut allanut noorarnerannik pissuteqarpoq. Partiilli maanna politikkikkut suleqataalluarnera, partiip ingerlalluarneranik tunngaveqartoq, siulittaasup tullia allappoq.
- Maannakkut naalakkersuisooqatigiinni suleqataavugut tamannalu tunngaveqarpoq inuiaqatigiinni kiffartuusseqataarusukkatta sunniuteqaqataarusullutalu, tassanilu maluginiagassaavoq inatsisartuni ilaasortaatitagut marluk inuusuttuupput naalakkersuisunilu ilaasortat marluk aappaa inuusuttuulluni ataaserlu misilittangartuujulluni taamaalilluta takutsipparput kinguaariit nutaat atassummi nunatta aqunneqarnerani ingerlatsisinnaasugut.
Atassut ukiuni 40-nngortorsiornera malunnartinniarlugu Nuummi arfininngornermi novembarip qulingani, Atassut Nuup aaqqissugaanik kaffellertoqassaaq.