Politik

Atassut: Tamanna atorfilittat pisuussutigaat

Politikerit inuinnaat naalakkersueqataanerat sernissortariaqarpaat imminnullu saassuttaqattaarunnaarlutik isornartorsiuinertik atorfilittanut sammitittariaqarpaat. Taakkumi amerlavallaartunik kukkuluttortarput, Steen Lynge taama isumaqarpoq

Atorfilittat isornartorsiorneqartariaqartut, Inatsisartuni ilaasortaq Steen Lynge (A) isumaqarpoq

Ukiuni kingullerpaani kanngunartuliat annerpaat arlallit atorfilittat amigartumik nakkutiginninnerattut imaluunniit suliaminnik sumiginnaanerattut nalilerneqartarput.

Suliat soorlu Pituffimmi kiffartuussinissamut isumaqatigiissummut tunngasoq, Naalakkersuisuni ilaasortat aningaasanik atuinerminni uppernarsaataat, aviisinut tapiisarnermut tunngasoq aamma avaleraasartuunik pisassiinerup suliarineqarnera akerleriissutaaqisoq qaleriiaatiinnalerput, tamakkulu pissutigalugit Namminersorlutik Oqartussat allaffeqarfianni ajortumik ingerlatsisoqarneranik isumaqartoqalersarluni.

Akisussaasut
Inatsisartunik aaqqissuussinermi suliani taama ittuni politikerit atorfilittanik isornartorsiuisarnerat ileqqorineqanngilaq. Tamannami periaatsitut kusananngitsutut isigineqarpoq.

Qitiusumilli allaffeqarfiup aamma Inatsisartut akornanni eqqissisimaqatigiinneq, Atassummeersup Steen Lyngep maanna nipangiusimaannarnianngilaa.

Taassuma periaatsitut erseqqissutut takusinnaavaa, ajortumik pisoqartillugu – qularnanngitsumik – akisussaanerpaasut tassaasut atorfilittat pinnagit, politikerit tamanut ammasumik isornartorsiorneqartarnerat maluginiartarpaa, tamannaluuggornartoqartillugu.

Allaffeqarfimmit kukkuneq
- Kukkuluttortoqartillugu Inatsisartuni ullutsinni ajoraluartumik immitsinnut naallerarfissarsiornermut nukippassuit atortarpavut. Matumanili maluginiarneqartariaqarluni kukkunerit ilarpassui allaffissornikkut kukkunerusarmata. Allaffeqarfimmit sullinneqarnerup amigaateqarnera isornartorsiornagu partiit illuatungiliuttuusut ilaannikkullu partiit naalakkersuisoqataasut kukkuneq pillugu Naalakkersuisuni ilaasortamik isornartorsiuisarput; naak arlalippassuartigut kukkuneq allaffeqarfimmit siunnersorneqarnerup amigaateqarneranik kukkusumilluunniit siunnersorneqarnermik pissuteqarsinnaasaraluartoq, Steen Lynge oqarpoq.

Taanna Naalakkersuisut siuliini (ukiup aappaata affaani) Naalakkersuisuni siulittaasumut tulliuvoq – sunalu oqallisiginerlugu immaqa misilittagaqarfigilluarlugu.

Taanna Inatsisartuni maanna ilaasortaavoq.

Allaaserisaq tamaat sapaatip-akunnerani AG-mi saqqummertumi atuaruk, pisiniarfinni imaluunniit uani ataani e-avisitut pisiarisinnaavat:

Powered by Labrador CMS