qinersineq
Atassut sinnerlugu qinigassanngortittoq: Qaqortumi mittarfiliortoqarli
Nunatta kujataani silaannakkut angallanneq iluarsineqartariaqartoq Atassut sinnerlugu Inatsisartunut qinigassanngortittoq, Bentiaraq Ottosen, oqarpoq
Qaqortumi mittarfittaarniarneq unitsiinnarneqassanngitsoq Demokraatit siulittaasuata Anda Uldumip siunnersuutigaa, tamanna Sermitsiaq.AG-mi pingasunngornermi allaaserineqarpoq.
Inatsisartunut qinigassanngortittoq Inuit Ataqatigiinneersoq Naja Lund timmisartoqarfiliornissamit aningaasat pitsaanerusumik atorneqarsinnaasut isumaqarpoq, tassani aningaasat atugarissaarnermut atorneqarnissaat kissaatigalugu.
Atassutip Inuusuttaanit Inatsisartunut qinigassanngortittoq Bentiaraq Ottosen oqallinnermut akuliuppoq. Qaqortumi mittarfiup suliarineqarnissaa kissaatigaa.
Aningaasaliisoqareersoq
- Qaqortumi mittarfiliornissaq pillugu aningaasaliissutit ingerlareermata qularnaarneqarnissaat orniginarnerusoq isumaqarpunga, tusagassiutinut nalunaarummi Bentiaraq Ottosen oqarpoq.
Nunatta kujataani angallannerup ilungersunarnerujussua oqaatigaa, tassani Qaqortumi ilinniagaqartut amerlanertigut eqqorneqartartut oqaatigalugu.
- Isumaqarpunga aningaasat pineqartut atugarissaarnermut atorneqartariaqanngitsut, tassami tapiissutit Narsarsuup mittarfiata ingerlanneqarnerani 23 million koruunit taakkununnga suliffissaaleqisunut qularnaarneqarsinnaammata, aningaasallu pineqartut atugarissaarnermut matussuserneqarsinnaapput, Bentiaraq Ottosen oqarpoq, nangillunilu:
- Nalunngilarput kujataani angalaniarneq akisoorujussuusoq, angalaniarnerlu
ajornakusoortorujussuulluni. Nunatsinni silaannakkut angallaneq oqimaaqatigiissarneqarnissaa anguniarneqartariaqarpoq, inuiaqatigiinnit akilersinnaasunngorlugu.