ineqarneq

Atassut sinnerlugu kujataani politikkerip Knud Kristiansen isumaqatiginngilaa

Kommune Kujallermi borgmesterip Jørgen Wæver Johansenip kommunimi savalimmiormiut kiffaq-kontomut eqqaanartoq atuutilersikkusuppaa, tamanna kommunimi ilaasortanit isumaqatigineqarpoq

Kommune Kujallermi kommunalbesyrelsimi ilaasortaq, Atassummit Josef Petersen

Kommuneq Kujalliinnarmi Inip attartortui 149-it, Inip nuna tamakkerlugu akiitsoqarneri pissutigalugit anisitassaanut 398-inut ilaapput.

Ineqarnermut, sanaartornermut attaveqaqatigiinnermullu naalakkersuisup, Atassummeersup Knud Kristiansenip, kiffaq-kontomik, tassa aningaasarsiat tigutinnagit akiligassanut ilanngaatsittarnermut qulakkeerinnissinnaasumik, eqqussisoqarsinnaanera kissaatiginagu oqaatigaa.

Kommuni Kujallermi borgmesteri Jørgen Wæver Johansen oqaluttuarpoq kommunimi siornali Namminersorlutik Oqartussanut attaveqareersimasoq savalimmiormiut periusiat atorlugu akiligassanut kinguaattoorutinullu aningaasarsianit ilanngaassisoqartalernissaanut eqqussisoqarnissaanut kissaateqartoqarluni.

Atassutip naalakkersuisoq isumaqatiginngilaa
Kommune Kujallermi kommunalbestyrelsimi ilaasortap Josef Petersenip Narsameersup Kommune Kujallermi borgmesteri isumaqatigaa.

- Aningaasaqarnermut ataatsimiititaliami ilaasortatut takusinnaavara akiligassat amerliartuinnartut kommunitsinni. Inuup kiffaanngissuseqarnera tapersersorpara, kisianni uani apeqqummi Jørgen Wæver Johansen tapersersorpara. Ajornartorsiummi iliuuseqarfigineqartariaqarpoq, ajornartorsiummi annertuvoq. Taamaattumik kommunitsinni savalimmiormiut periusiannut assingusoq 'kiffaq-konto' atuutilersinneqartariaqarpoq, Josef Petersen Sermitsiaq.AG-mut oqarpoq.

Taamaattumik parteeqatini Knud Kristiansen tassani apeqqummi isumaqatiginngilaa.

Kommunit kattussuunneqarsimanerat pissutaaqataalluni ajornartorsiutit takkussuussimasut Josef Petersen oqarpoq.

Narsami suliffissaaleqisut amerlavallaartut
- Eqiterutitsinerup kingunerisaanik suliffissat arlaqartut matuneqarput. Taamaattumik suliffissaaleqisut amerlipput. Illoqarfitsinni suliffissaaleqisut amerlavallaaqaat, taamaattumik iliuuseqartoqartoqartariaqalerpoq. Taamaattumik isumaqarpunga kommunitsinni suliffissanik periarfissiissutit ammaffigineqartariaqarnissaat isumaqarpunga soorlu aatsitassarsiorneq, Josef Petersen oqarpoq.

Kommune Kujallermi kommunalbestyrelsimi ilaasortaq Benjamin Kielsen Sermitsiaq.AG-mit aamma oqaloqatigineqarpoq. Borgmesterip Jørgen Wæver Johansenimit siunnersuutigineqartoq, tassa savalimmiormiut periusiat atorlugu akiligassanut kinguaattoorutinullu aningaasarsianit ilanngaassisoqartalernissaanut eqqussisoqarnissaanik siunnersuutaa, tamakkiisumik isumaqatigaa.

Powered by Labrador CMS