sipaarniarneq
Atassut Qaasuitsoq: Peqqinnissaqarfiup sipaarniarfigineqarnera kukkuneruvoq
Peqqinnissaqarfiup Naalakkersuisunit sipaarniarfigineqarniarnera Qaasuitsup Kommuniani Atassut sinnerlugu kommunalbestyrelsimi ilaasortaasup parteeqatini Naalakkersuisooqatigiillu isornartorsiorpai. Sipaarniarnermimi Qaanaaq aamma Qasigiannguit eqqorneqartussaapput
50 million koruuninik sipaarnissamut Naalakkersuisut aningaasanut 2015-mut inatsisissaannut nassaartussaapput.
Peqqinnissaqarfik sipaarniarfigineqassaaq, tassani illoqarfiit Qaanaaq aamma Qasigiannguit eqqorneqartussaapput.
Taamatut Naalakkersuisut siunnersuuteqarnerat Qaasuitsup Kommuniani Atassut tunuliaqutaralugu kommunalbestyrelsimi ilaasortaasup Qaanaarmiup Masauna Pearyp isornartorsiorpaa. Illoqarfiit taaneqartut sipaarniartoqarneranik eqqorneqartussaanerat paasisinnaanngilaa.
- Sipaarniarfigineqareernikuupput paasinarporlu Naalakkersuisut suli qaavatigut sipaarniarfigerusukkaat. Kiisa apeqqusernarsivoq anguniarneqarnersoq inuup inuuneranik nalilimmik sipaarniartoqarnersoq piffinni taakkunani, tusagassiutinut nalunaarummi Masauna Peary oqarpoq.
Peary: - Siunnersuut utertinneqarli
Nangillunilu:
- Aamma tupigissaqaara Atassutip Peqqinnissaqarfinnut sipaarniarneq taamatut isikkoqartillugu akuerissappagu, tassami Partip Atassutip pingaartitaralugu oqariartortarnikuummat 'Inuk qitiutillugu' sulinini, aammalu qineqqusaarnerni qulequttatut pingaarnertut oqariartuutigisarnikuummagu. Neriuppunga suli taakku oqaaseqatigiinnguit malissagunikkit peqqinnissaqarfimmut sipaarniarnerit akuersaarnagit oqariartussasut.
Taamaammat Naalakkersuisut siunnersuutaat tamarmik taamaatinneqassasut kaammattuutigaa.