Atassut: Nuummi siunissami sanaartornerit aningaasanut inatsip avataatigut ingerlanneqarsinnaapput

Akileraartarnermut aaqqissuussaanitsinni akissarsiaqqortunerit salliutinneqartut Inuit Ataqatigiinnit Kommuneqarfik Sermersuumi kommunalbestyrelsimi ilaasortaq Allan Pertti Frandsen isumaqarpoq. Kiisalu ineqarnermut Nunatsinni politikkeqartugut ukiumut pisortanut 450 million koruunilimmik.

- 100 millionit boligsikring-imut isertitakinnerusunut ingerlasarput. 350 million-illu nammineq pigisamik illusinermi ernianut tapiissutaasarput, pissaqarnerusunut iluaqutissatut. Pisortat ineqarnermut tapiissutaanit 4,50-inik, 3,50-it kukkusunut tuttarput. Taakkulu nunatsinni piitsut, pisuullu assigiinngissutaannut annertusaaqataaginnarput, Allan Pertti Frandsen oqarpoq, tamannalu Sermitsiaq.AG-mi ataasinngornermi allaaserineqarpoq.

Erniat ilanngaataata annikillisarneqarnissaa
Inatsisartunut qinersinissamut qinigassanngortittoq Jacob Abelsen, Atassut, isumaqataanngilaq.

- Pigissaartunut 60/20/20-mik aningaasaliisarneq kisimi pitsaasuunngilaq. Jacob Abelsen Allan Pertti Frandsenimut akissuteqarpoq.

Inuit Ataqatigiit Demokraatillu naalakkersuisooqatigiikkallarmata erniat ilanngaataata annikillisinneqarnissaa partiinit taakkunanit sulissutigineqarsimasoq Atassummi polikkerimit eqqaamaneqarpoq. Tamanna ukiuni sisamani ingerlasussaasimasumi piviusunngorsimasuuppat illuseqqaarniat akissaqarsimasimassanngikkaluartut isumaqarpoq.

- Illunik tuniniaanerni IA-mit ernumasaarisoqarnera Atassummut iluarineqanngilaq. Tamanna tuniniaasut pisariaqartinngilaat. Illussanik tuniniaasut bankillu toqqissisimasariaqarput. Nuummi 60/20/20-nik aningaasaliisarneq peerneqassappat kingunerlussaaq. Tamanna suliffissaaleqisunut inissaaleqisunullu eqquissaaq, Jacob Abelsen oqarpoq.

Aningaasanut inatsip avataatigut
Jacob Abelsen oqarpoq Atassutip Nuummi inissialiortitsinerup annertusarneqarnissaa sullitigigaa oqaatigaa.

- 60/20/20-nik aningaasaliisarnerit aqqutigalugit inissialiortarnerit peqqutaallutik siunissami aningaasanut inatsip avataatigut Nuummi inissialiortoqartalersinnaassaaq. Tamanna Illuut A/S aqqutigalugu siunissami sanaartortoqarsinnaassaaq, Jacob Abelsen oqarpoq nangillunilu:

- Aningaasanut inatsip avataatigut sanaartortoqartalerpat pitsaanerusumik aamma sanaartornissamut pilersaartoqartalissaaq. Tamanna Nusukamit aamma GA-mit piumasarineqartareerpoq. Ukiaanerani sanaartornerit 15-20 procentinik aningaasartuutit ikilissapput pitsaanerusunillu inissialiortoqarsinnaalissalluni.