Nangaaneq

Atassut neqeroortitsinermut inatsimmut tukumasaarisoq

Neqeroortitsinermut inatsimmi pisortat pisiortortarnerat ersarissumik malittarisassiunneqassapput, taamaaliornikkut akileraarutit sipaarneqartalissallutik. Taamaattoq inatsisissarlu kingaatsumik ingerlanneqarpoq.

Mala Høy Kuko

Neqeroortitsinermut inatsisissamut nalornisoqarpoq. Taama isumaqarpoq Atassumminngaanneersoq Mala Høy Kuko, suliallu sukkanerusumik ingerlanneqarnissaa kissaatigaa.

Neqeroortitsinermi inatsimmi Namminersorlutik Oqartussat atuineranut aammalu kiffartuussinernik pisisarnerinut erseqqissunik malittarisassaqassaaq.

2015-mi aalajangerneqartoq

Malittarisassallu taama ittut piginissaat pisariaqartoq, Mala Høy Kuko (A) isumaqarpoq.

- Kalaallit inuiaqatigiinni aningaasarsiornikkut unammilligassat eqqarsaatigalugit, inissisimaffik pingaarutilimmiippugut, tassanilu piffissaagallartillugu aningaasaatinik atuinissaq qajassuussilluni ingerlanneqartariaqarpoq, taanna siunnersuummi tunngavilersuilluni allappoq.

Mala Høy Kukollu nukingitisassimaarneranut pissutaavoq, Inatsisartut 2015-milu Naalakkersuisut malittarisassialiornissaannik suliakkiisimammata.

Naalakkersuisut ilisimatitsissutigivaat, siullertut neqeroortarneq aamma pisiortortarneq pillugu kaajallaasitamik suliaqaqqaarumallutik, tassuunakkut misilittagaqalernissaq qulakkeeqqaarumallugu inatsisiliornissamut tunngavissiisinnaasut.

Kaajallaasitaqanngitsoq

Kaajallaasitarlu aamma iluatitsiffiusimanngilaq. Paasissutissaq paragraf 37 atorlugu Inatsisartut nukingisaarutigisariaqarsimasaat.

Tamanalu tunngavigalugu, Mala Høy Kuko ukioq naatinnagu kaajallaasitap piareerneqarnissaanik siunnersuuteqarpoq.

- Atassummi isumaqanngilagut, arlaannaatigulluunniit Inatsisartunut iluaqutaassasoq, siunnersuutit saqqummiuteqqittaarnissaannik aammalu § 37 atorlugu apeqquteqaqattaarnissamut innersuunneqaqattaarnissaq, Inatsisartummi aalajangereerput, maannakkullu Naalakkersuisut pisussaaffigaat Inatsisartut siusinnerusukkut neqeroortitsinermut inatsisiliortoqarnissaannik aalajangersimasaata timitalerniarneqarnissaanut, tassalu Naalakkersuisut kaajallaasitamik nutaamik atulersitsissallutik, matumani siunnersuummi eqqartorneqartutut, Atassumminngaanneersoq saqqummiinermini allappoq.

Najugaqartut pisiniarfigisarneri

Kaajallaasitaq 2017-mi piareerneqarnissaanut Naalakkersuisut peqataarusupput. Akileraartarnermut Aningaasaqarnermullu Naalakkersuisoq Aqqaluaq B. Egede akissuteqarluni taama allappoq. Nunami namminermi annertunerusumik pisiortornissaq kaammattuutigineqassasoq, taassuma ilanngunneqarnissaa kissaatigaa.

Siunnersuut ullumi Inatsisartuni suliarineqassaaq.

Powered by Labrador CMS