Aleqap atornerluinera

Atassut Naalakkersuisooqataajunnaarpoq - qinersisoqarnissaa piumasaraat

Siumut kisimi Naalakkersuisuutitaqalerput

Steen Lynge (saamerleq) Siverth K. Heilmannilu

Ineqarnermut naalakkersuisoq Siverth K. Heilmann, Atassut, nalunaarpoq Atassut Naalakkersuisooqataajunnaartoq.

Tusagassiortunut katersuutitsinermi Siverth K. Heilmann naalakkersuisutut tunuarluni aamma nalunaaruteqarpoq.

Ilinniartitaanermut, kultureqarnermut, naligiissitaanermut ilageeqarnermullu naalakkersuisoq Nick Nielsen, Siumut, inuussutissarsiornermut aatsitassarsiornermullu naalakkersuisoq Siumumeersoq Jens-Erik Kirkegaard kiisalu peqqissutsimut attaveqarnermullu naalakkersuisoq Atassummit Steen Lynge naalakkersuisutut tunuartut aamma nalunaarutigineqarpoq.

- Pisut kingulliit pillugit inuiaqatigiit toqqissisimajunnaarnerat, nalornisinneqarnerallu Atassummit ilungersunartorujussuartut tiguarput. Inuiaqatigiit naalakkersuisunut, inatsisartunullu tatiginninnerat utertittariaqarpoq. Inuiaqatigiit toqqissisimanerat utertittariaqarpoq. Inuiaqatigiit qinikkanut tatiginninnerat pilerseqqittariaqarpoq, Atassut sinnerlugu siulittaasoq Knud Kristiansen aamma siulittaasup tullia Steen Lynge nalunaarput.

Naalakkersuisut siulittaasuata Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pillugu naalakkersuisut pingasut kinguneqartitsillutik tunuarput.

Taamaasilluni Siumut kisimi Naalakkersuisuutitaqalerpoq.

Aningaat maajip 28-anit 2013-mit maajip 21-anut 2014-mut aningaasat Aleqa Hammondimit atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.

Powered by Labrador CMS