imigassanik nioqquteqarneq

Atassut: Imigassaq pillugu oqallisissiaq IA-p paatsoorpaa

- IA Sermersuup kommunalbestyrelsiani ilaasortat, najukkap iluani, nunalu tamaat politikkerneq taputartuunnaveersaassavaat, Atassutip siulittaasua Knud Kristiansen oqarpoq

Atassutip siulittaasua Knud Kristiansen

Inatsisartunut ilaasortap Steen Lyngep (A) qanittukkut siunnersuutigaa, Tunumi imigassamik aalakoornartulimmik nioqquteqarneq unitsikkallarneqartariaqartoq.

Tamanna Inuit Ataqatigiit kommunalbestyrelsimut ilaasortaatitaanut Malene Lyngemut KNR-ikkut oqallissaarummik isornartorsiunermik kinguneqartitsivoq.

- Aaqqiissutissaasorinngilarput. Tasiilami ajornartorsiutigineqartut assigiinngitsorpassuupput, aaqqiissutissallu assigiinngitsorpassuit pisariaqartinneqarput, taakkulu innuttaasut sunniuteqaqataaffigisariaqarpaat. Qulaatiinnarlugit oqarfigisinnaanngilagut; aqussinnaannginnassiuk matuarput. Tamanna isumaqataaffiginngilarput, Malene Lynge KNR-imut taama oqarpoq.

Atuaruk: Tunumi imigassamik tuniniaaneq unitsikkallarneqarnissaa siunnersuutigigaa

Najukkami aamma nuna tamaat assigiinngissuteqartut
IA-p qisuariaateqarnera Atassutip siulittaasuanut qisuariartitsivoq.

Steen Lyngep oqallissaarutaa, IA-p paatsoorsimagaa Knud Kristiansenip tusagassiuutinut nalunaarummi erseqqissarpaa.

- Qinikkat, aamma Atassummi, nunap iluani pissutsit, nunalu tamaat eqqarsaatigalugit oqallisissiatigut aallaaveqarnerat puigussanngilarput. Taamaattumik isumaqanngilaq, partiimi sammiviit arlallit tunaartarineqartut, Knud Kristiansen allappoq.

Oqallinnissaq pisariaqartoq
Sumiiffiit aallaavigalugit ajornartorsiutit qitiusumit peqataaffigineqartumit iliuuseqarfigineqartarnissaat, iliuuseqarneq kinguneqartassasoq, tassanilu aamma innuttaasut peqatigalugit aallaaveqassasoq, taanna isumaqarpoq.

- Taamaattumik oqallinnissap aallartisarnera, innuttaasullu oqalliseqataalernissaat pingaaruteqarpoq, Atassutip siulittaasua erseqqissaavoq.

Atuaruk: Meeqqat Illersuisuat: Maannakkorpiaq iliuuseqartoqartariaqarpoq

Powered by Labrador CMS