Atassut Ilulissat Naalakkersuisunut akerliuvoq

Inuit issittormiut siunnersuisooqatigiiffiannut ICCmut tapiissutit atorunnaarsikkiarnissaannik Naalakkersuisut aalajangernerannut Atassut Ilulissat akerliulluinnarpoq. Atassutip Ilulissani immikkoortoqarfia isumaqarpoq ICCp nunat inoqqaavisa inuillu pisinnaatitaaffiinik illersuisuunera landskarsimi qujamasuuteqarfigineqarnerusariaqartoq.

2014-mut aningaasanut inatsit Siumup Atassutillu akuersissutigigamikku ilanngullugu aalajangiuppaat ICCmut tapiissutit ilanngarneqassasut. 2018-ip tungaanut tapiissutit atorunnaariartornissaat ilanngullugu aalajangiunneqarpoq. Tamanna pissutigalugu ICC Kalaallit Nunaata aarleqqutigaa 2018-mi matuinnartariaqalersinnaallui,

Naalakkersuisut isummersimanertik allanngortinnianngilaat naak ICC-mit aamma Inuit Ataqatigiinnit akerlilersorneqaraluarlutik. Maanna Naalakkersuisut tunulequtaannit aamma akerliusoqalerpoq.

Kulturimik illersuisut
- ICC-p pitsaasumik siunnerfeqarluni anguniagai sorpassuarnik ilaqaraluartut taakkuinnaalluunniit eqqarsaatigalugit tupinnarpoq, kulturitsinnik kiisalu inuttullu pisinnaatitaaffitsinnik nunar-suarmioqatitsinnut naalakkersuinikkuunngitsoq oqariartortuusartutuaq suujunnaarsinniarlugulusooq siunnerfeqalerneq, Atassut Ilulissat tusagassiutinut nalunaarummini allappoq.

Taamaattumik Atassutip Ilulissani immikkoortoqarfia piumasaqarpoq ICCmut tapiissutit peeriartornissaannik isummernerup allanngortinneqarnissaanik.

- Suliniutit pitsaasut, nunarsuarmioqatitsinnut ammasumik oqariartuutigineqartartut, sumi inunngorsimaneq , ammip qalipaata , qanoq upperisaqarneq ilaalu ilanngullugit apeqqutaatinnagit ataqqineqaqqullugit suliniuteqartoq tapersersorluinnartariaqarparput, ICC-mik nungutitsiniaaneq piunnaarlugu, Atassut Ilulissat nalunaarpoq.