Inatsisartunut qinersineq
Atassut atsiornernik 1000-nik katersisimavoq
Partii Atassut pisariaqartitaminik atsiornernik katersisimalerpoq, partii taamaalilluni Inatsisartunut qinersinissamut sassartitaqarniassagami.
Partiip siulittaasua, Siverth K. Heilmann, piffissami taama sivikitsigisumi atsiornerit pisariaqartinneqartut katersorneqarsimammata nuannaarlunilu tulluusimaarluni, KNR-imut oqarpoq.
Piumasaqaat sinnerlugu
Atsiornerit 942-t katersorneqarnissaat qinigassanngortitsisinnaanermut piumasaqaataavoq.
Juulli sioqqullugu partii atsiornernik katersuilerpoq, tamannalu illoqarfinni sisamani annerusumik pivoq: Maniitsoq, Sisimiut, Nuuk aamma Qaqortoq.
Mala Høy Kuko ukiakkut 2017-imi partiimit anilluni Siumumut nuummat, partiip Inatsisartuni issiavini kingulleq annaavaa.
Ukioq qinersiffiusoq
Novembarip 28-anni qinersisoqarneranit ukiut sisamat qaangiutissapput, tamannalu qinersinissap naammassinissaanut ulloq kingulliussaaq. Qinersineq siusinnerusukkut pisinnaavoq. Qinersinissamut ulloq Kim Kielsenip aalajangertussaavaa.