akitsuutit
Atassut: Akitsuutinik qaffaaneq tamanut naapertuutissaaq
Naalakkersuisut aningaasanut inatsisissatut siunnersuutimikkut akitsuutinik qaffaaniarnerat Atassummit Inatsisartunut ilaasortap Steen Lyngep aamma akerlilerpaa
Naalakkersuisut aappaagumut aningaasanik inatsisissatut siunnersuutimikkut akitsuutinik qaffaaaniarnerannik oqallinnermut Atassut aamma akuleruppoq.
– Naalakkersuisut aningaasanut inatsisissatut siunnersuutaata qanoq katitigaanera Atassutip isumaqatiginngilaa. Nioqqutissat arlallit akitsuutaasa qaffanniarnerat tamanut naapertuutissaaq, Atassummeersoq Steen Lynge tusagassiorfinnut nalunaarutikkut allappoq.
Isumalluarpallaartut
Taassuma erseqqissarpaa Atassutip isornartorsiuinini attatiinnaraa, tassa aningaasanut inatsisini ukioq manna tikillugu sammisaqarfiit nalorninartulerujussuit isumalluarfigineqarpallaartarnerat, tamannalu pissutigalugu kingorna ataqatigiikkunnaarajuttarluni.
– Atassut isumaqarpoq siunissami aningaasanut inatsisit piviusunik tunngaveqarnerusassasut, aammalu tunngavissat nalorninartullit aningaasanut inatsimmut ilanngunneqassagaangata mianersornermut tunngavissat qaffasinnerusut atorneqartalissasut, Inatsisartunut ilaasortaq Steen Lynge allappoq.
Akissaatikitsut eqqorneqassapput
Politikeri Atassummeersoq Steen Lynge isumaqarpoq akitsuutit qaffannerisigut akisaatikinnerit eqqorneqassasut:
– inuuniarnermi pisariaqartitat soorlu neqit akitsuutaat qaffanneqarpata tamanna equngasumik eqqueqqiinnassaaq, kalaallillu tunisassiaannik pisisarnerulernissamik tunngavilersuut atorsinnaanngilaq, akitsuutit qaffaataat kalaalimernit akikinnerulernissaannut atorneqanngippata. Akitsuutitigut taamaallaat akissaatikinnerit eqqorneqassapput, tamakkua neqinik pisinissaminnut akissakinnerulissammata.
Naapertuilluarnerusoq
Nioqqutissat arlallit akitsuutaat qaffannagit Atassutip aningaasarsianit akileraarutit qaffatsikkusunneruvai.
– Naapertuilluarnerussaaq aningaasarsianit akileraarutit 1 procentimik qaffanneqarpata, tassuunakkut nammatassiineq assigiinnerulissammat, taamatumuunakkullu akissaatikinnerit annikinnerpaamik eqqorneqassallutik, Steen Lynge allappoq.
Erseqqissarpaali Atassutip isumaqatigisinnaagaa tupat nioqqutissallu peqqinnanngitsut allat akitsuutaasa qaffanneqarnissaat, akileraarutit qaffannerisigut aningaasanut inatsimmi amigaatigineqartussat matuneqarsinnaanngippata.