Atassummit qinigassanngortittoq: Utoqqaat illersuisumik pisariaqartitsipput
Qulutannguaq Berthelsen, Atassut sinnerlugu Inatsisartunut qinigassanngortittoq, utoqqaat illersuisuannik pilersitsiniarpoq
Inatsisartunut qinersinisssamut Atassummit qinigassanngortittoq, 33-nik ukiulik Qulutannguaq Berthelsen Nuummeersoq, utoqqaat illersuisoqalernissaannik siunnersuuteqarpoq.
- Meeqqat illersuisuannik pilersitsineq iluatsilluarpoq. Meeqqat pisinnaatitaaffimminnik ilisimasaqalerput. Meeqqat atugaat pillugit oqallinneq annertusilluni ingerlalluarpoq. Utoqqaat inuuniarnerminni atugaat pitsanngortinniarlugit illersuisumik pilersitsinissaq maanna piffissanngorpoq, Qulutannguaq Berthelsen allappoq.
Taannalu nangippoq:
- Utoqqaat ukiorpassuarni nilliaatigiuarpaat inuuniarnerminni atukkatik oqimaaqisut pillugit, utoqqaat kattuffiat nilliaateqartaraluaqaat annerusumillu qinikkaniik tusaaniarneqassanatik. Taamaattumik illersuisoqalerunik utoqqaat pisinnaatitaaffii siuarsarneqassapput, Qulutannguaq Berthelsen oqarpoq.
Utoqqaat ataqqineqarnissaat kissaatigigaa
Utoqqarpassuit inuuniarnermikkut atugarissaarneruniarlutik Danmarkimut nuuttartut, Qulutannguaq Berthelsen isumaqarpoq.
Atassummiik pingaartitaraarput utoqqartatta oqinnerusumik atungaqalernissaat, utoqqaat inuuneqqortusiartuinnarnerat ilutigalugu saniatigut sulisinnaanerat periarfissaq annertusartariaqarpoq, utoqqaat atugarissaanerulernissaat anguniassavarput sulinermikkut isertitaqalaartullu piaaffigineqartarnerat allanngortissavarput, taanna oqarpoq.
Utoqqartatsinnut tamatta ataqqinninnermik takutitsinerusariaqartugut, Qulutannguaq Berthelsen tamatuma saniatigut isumaqarpoq.
- Ukiorpassuarni sulisimaneri inuiaqatigiinni, iluaqutaaneri ilisimasatigullu silatussuseqarneri kinguaariinnut ingerlatitseqqittussatut atorluartariaqarpagut aammalu tunniussaqarsinnaaneri meerartatsinnut inuusuttortatsinnullu ingerlateqqittaraqarpagut, taanna oqarpoq.