qinersineq
Atassummit qineqqussaartoq: Ilinniagaqarnersiutit ima qaffanneqarsinnaapput
Atassut sinnerlugu Inatsisartunut qinigassanngortittoq Masauna Peary, ilinniagaqarnersiutinik qaffaarusuppoq, naartuersittartut akiliisittalerneqarsinnaasut assersuutigaa
Atassutip Inuusuttai Inatsisartunut qinersinissamut piareersarput. Taakkuami arfinilinnik sassartitaqarniarput. Sassartussallu kissaatigisaasa ilagaat ilinniagaqarnersiutit, maanna qaammammut 4.500 koruuniusut, siunissami qaffanneqarnissaat:
- Isumaqarpugut ilinniagaqarnersiutit qaffanneqarnissaannut piffissanngortoq. Ilinniagaqarnersiutimmi ukiuni arlalinni qaffanneqarnikuunngillat, naak inuuniarnermi aningaasartuutit qaffakkiartorsimagaluartut, Atassutip Inuusuttaasa siulittaasuat, Masauna Peary, Sermitsiaq.AG-mut oqarpoq.
Naartuersittartut akiliuteqartalernerisigut qaffaasoqarsinnaasoq
Kisianni ilinniagaqarnersiutit qanoq qaffanneqartigisinnaanerat inuusuttut sassartussat eqqartorsimanngilaat, taamaattorli suminngaanniit aaneqarsinnaaneri oqaluuserisimavaat:
- Aningasat naartuersittartunit aaneqarsinnaasut assersuutaasinnaavoq. Ilisimavarput arnat 1000-it missaat ukiumut naartuersittartut, naartuersinnerlu ataaseq aamma 10.000 koruuninik inuiaqatigiinnut akeqartartoq. Tassa imaappoq peqqinnissaqarfiup ukiumut 10 million koruunit missaat naartuersittartunut aningaasartuutigisarpaat, Masauna Peary, Sermitsiaq.AG-mut oqarpoq, imalu nangilluni:
- Ilaatigut eqqartornikuuarput arnat naartuersittartut akiliuteqartalernissaat. Immaqa siullerpaamik naartuersittut aningaasartut 5 procentianut akiliuteqartarsinnaapput, arlaleriarlutillu naartuersittut suli annertunermik akiliisinneqarsinnaassallutik, Masauna Peary oqarpoq.
Qaffaanissaq ilinniartunut piumasaqaateqarfiussaaq
Kisianni ilinniagaqarnersiutit qaffanneqassappata, taava Masauna Peary isumaqarpoq qaffaaneq piumasaateqarfiusariaqartoq:
- Ilinniartut piffissaq eqqorlugu ilinniarfimminiittartut tamakkiisumik ilinniagaqarnersiuteqassapput, kisiannili piaaralutik atuanngitsoortartut ilinniagaqarnersiutiminnik ilanngaavigineqartassapput. Aammami tassa taamatorpiaq suliffeqarfinni maanna iliortoqartarpoq. Sulinngikkuit aningaasarsineq ajorputit, Masauna Peary oqarpoq.
Atassutip inuusuttaasa Inatsisartunut sassartitassaat ukuupput: Masauna Peary, Kaj-Peter Heinrich aamma Qulutannguaq Berthelsen tamarmik Nuummiit, Karen-Louise G. Jørgensen Upernavimmiit, Aqqalu Jeremiassen Ilulissaniit, kiisalu Bentiaraq Ottosen Qaqortumiit.