apeqquteqaat
Atassummeersup Steen Lyngep KNR-ip akigititai tupigai
Atassummeersup Steen Lyngep akissutissarserusuppaa sooq KNR qallunaat nunatsinni ilinniartoqarfinnut akigitittagaannit 20-riaammik akisunerusumik akiliisitsisarnersoq
Atassut sinnerlugu Inatsisartuni ilaasortap Steen Lyngep KNR-i nunatsinni ilinniartoqarfinnut aallakaatitassiaminik kopeersissussigaangami, ilinniartoqarfiit Danmarkimi assigusumik isumaqatigiissuteqarfigisaannit sooq 20-riaammik akisunerusumik akiliisitsisarnersoq tupigaa.
- KNR inuiaqatigiinnit aningaasalersorneqartoq kiffartuussisussaasorlu ilinniartoqarfinnik kiffartuussinermini akigitittagaat suut tunngavigalugit annertussusaat aalajangerneqartarpat?
Taama Inatsisartuni ilaasortaq paragraf 37 naapertorlugu Naalakkersuisunut apeqquteqarpoq.
Steen Lyngep nassuiaanera naapertorlugu nunatsinni ilinniarfiit ilinniartitsinerminni KNR-ip nutaarsiassaqartitsivianit aallakaatitat nalinginaasumillu aallakaatitassiat atortarpaat.
- Tamannalu KNR-ip aammalu ilinniartaanermik susassaqartut akornanni isumaqatigiinnikkut aaqqinneqarsimavoq, Steen Lynge allappoq.
Atuaruk: Demokraatit IA aamma KNR pillugu suliaq qatsuppaat
Isumaqatigiissummi assigusumi 25 koruuneertarput
Kisianni Steen Lyngep paasisinnaanngilaa sooq ilinniarfiit 20-riaammik akisunerusumik KNR-imut akiliuteqartariaqarnersut Danmarkimi isumaqatigiissuteqarfigisaminnut assigusumut sanilliullugu.
- Taamatut kiffartuussineq KNR-ip 500 koruuneqartittarpaa. Sanilliullugu oqaatigineqarsinnaavoq nunatsinni ilinniartitaanermik susassaqartut aamma Danmarkimi sussaqqartut akornanni assigusumik isumaqatigiissuteqartoqarmat. Taamatullu Danmarkimiit kiffartuunneqarneq taamaallaat 25 koruuneqartinneqartarluni, Steen Lynge allappoq.
Imalu nangippoq:
- Tamaammat KNR-ip ilinniartoqarfinnut akigitittagai Danmarkimit kiffartuussinermut sanilliukkaanni qaffasippallaarnerat oqaatigineqarsinnaavoq.
Naalakkersuisut KNR-ip akigititaasa annertussusaat allanngortinniarlugit sulissuteqarniarnersut ilanngullugu Steen Lyngep paaserusuppaa.
Atuaruk: Demokraatit isornartorsiuinerat IA-mit tupaallaatigineqarpoq
AG-mi sapaatip matumani saqqummersumi atuarneqarsinnaapput 'KNR sakkortuumik tatineqartoq' aamma 'KNR-ip pisortaata iliuusissaarulluni tusagassiorfiit saassuppai'. Aviisi ataani pisiariuk: