Kunngikkormiut Nunatsinniinnerat
Ataqqinartorsuakkut nunatsinni saqqummersitsinissamut piareersimasut
Dronning Margrethe prinsilu eqqumiitsuliortuupput Kalaallit Nunaannilu saqqummersitserusullutik
Ataqqinartorsuakkut Sermitsiami sapaatip-akunnerani saqqummersumi apeqqarissaarfigineqarneranni dronningi prinsilu Kalaallit Nunaannut attaveqarnerminnik oqaluttuarput.
Toqqaannartumik aperineqarlutik marluullutik akipput Kalaallit Nunaanni saqqummersitsineq soqutiginarsinnaagaluartoq.
Dronningi Kalaallit Nunaannut angalasarnerpassuarmini najoqqutassatut titartaaffissanik nassataqartarsimavoq sumiiffinnillu assigiinngitsunit imilertakkanik qalipaasarsimalluni.
Aviisimi dronningip Nuummi marlunngornermi juulip 21-ani pisortatigoortumik nerersuaqatigiinnermi oqalugiaataa tamakkerlugu aamma ilanngunneqarpoq.
Dronningip ilaatigut oqaatsit kinaassutsillu ukiuni makkunani pingaaruteqarluinnarnerat iserfigaa.
- Nunap inuiaallu nunarsuarmioqataaleriartuaarnerup nalaani unillatsiarluni imminut ima aperinissaa pitsaasuullunilu pissusissamisuussaaq: kikkuuvugut, naleqartitavut suuppat uatsinnorpiarlu qanoq pingaaruteqarpat? UAGUMIK tamatuminnga pilersitsineq pingaaruteqarpoq; isumaliutilli tamakkua UAGUTSINNIK TAAKKUNINNGALU eqqarsalernissamut ingerlaqqissutaannginnissaat taamatulli pingaartigaaq. Kalaallit Nunaannut kissaatigaara naligiinneq assigiinngissutsillu pillugit oqaloqatigiinnerup nunami alutornartorsuarmi tassani tamanut assigiinngiiaassuseq, ammasuuneq ataqatigiinnerlu nukittorsassagai, dronningi Nuummi ilaatigut oqarpoq.
Ataqqinartorsuakkut nunatsinnut tikeraarnerannut tunngasunik atuagaqarnerorusukkuit aviisi tamaat uani pisiarisinnaavat.