Atammimmi kinguaassiutitigut atornerlunneqarsimasut amerlapput

Ukiut 17-it matumat siorna ujarassiooq Victor McGregor Atammimmi ukiuni 30-ni nukappiaqqanut kinguaassiutitigut atornerluisarsimasutut tigusarineqarlunilu unnerluutigineqarpoq. Tigummigallarneqarnermilu nalaani taanna imminut toqulluni.

Kingunerluutit

Kinguaassiutitigulli atornerluisup toqunera Atammimi suliamut unitsitsinngilaq, killormuanillu.

Kinguaassiutitigulli atornerlungaasimasut suli annertuumik kingunerlutsitsisut, februarip qaammataani Namminersorlutik Oqartussat misissuinerani paasineqarpoq.

Namminersorlutik Oqartussat juunip qaammataani tarnip pissusiinik ilisimasallit marluk Atammiliartippai, Atammimmiinnerminnilu inuit ataasiakkaarlutik oqaloqatigalugillu, inersimasut meeraanerminni kinguaassiutitigut atornerlunneqarsimallutik
kingunerluuteqartut qanoq amerlatigisut misissuiffigalugit.

Aammattaaq marloriarlutik ammasumik innuttaasunik ataatsimiisitsipput, innuttaasunullu siunnersuillutik.

McGregorimit kinguaassiutitigut atornerluinerit arlallit

Aammattaaq Qeqqata Kommuniani ilaqutaariinnermut pisortap sullissisulli nunaqarfimmut tikeraarsimapput, tassani suliniutigineqartoq pitsanngorsaavigineqarnissaa siunertaasimalluni.

Qeqqata Kommuniani Maniitsumi Ilaqutariinnermut Immikkoortortaq aasap ingerlanerani arlaleriarluni Atammiliarpoq, inunnillu eqqugaasimasunik ataavartumik oqaloqatiginnittarnerit kinguneqarluarsimallutik.

- Ammasumik oqaluttuarsinnaalernerup kingunerisaanik, kinguaassiutitigut atornerlunneqarsimasut ilimagisamit amerlanerusut paasineqarsimapput, ilimagineqarsimasumiillu suliaq annertunerujussuulluni, Qeqqata Kommunia tusagassiuutinut nalunaarummi allappoq.

Suliunuteqarneruneq

Tamanna tunngavigalugu kommuni suliap ingerlateqqinnissaanut periusiorsimavoq.

- Suliaq ilungersunarlunilu artornarpoq, ajornaatsunillu aaqqiissutissaqarani. Taamaattumik eqqugaasut ikiorneqarfissaasigut

ikiorserniarlugit tamat isiginnissuteqartumik sulivugut, Qeqqata Kommuniani Ilaqutariinnermut Isumaginninnermullu Ataatsimiititaliami siulittaasoq, Hans Frederik Olsen (S) oqarpoq

Pikkorissaanerit ikiuigasuartartulli

Kommuni siunissami suliniuteqarnissamini, killissat pillugit meeqqanut paasisitsiniaasarlunilu angajoqqaanik pikkorissaasassaaq. Meeqqat atuarfiat akuutinneqassaaq, nunaqarfimmilu ikiuigasuartartussanik pilersitsisoqassalluni. Qeqqata Kommuniata Atammimmut angalatitsisarnini aamma ingerlatiinnassavaa. Tamatuma saniatigut ilaqutariinnut katsorsaavissamik pilersitsinissamut, Namminersorlutik Oqartussat ikiorsiinissaannik kommunip qinnuvigivai.

Tamatuma saniatigut tarnip pissusiinik ilisimasallit 2017-imi septembarip novembarillu qaammataanni Atammimmiissapput, innuttaasullu piumasut peqataaffigisinnaasaannik pikkorissartitsiniarlutik. Innuttaasut kisimiillutik tarnip pissusiinik ilisimasalimmik
oqaloqateqarnissaminnut aamma periarfissaqassapput.

- Nunaqarfimmi innuttaasut eqqugaasimasut, ilaqutariit, meeqqat inuusuttullu immikkut isigalugit suliniuteqarnissatsinnut pilersaarusioreerpugut. Neriulluarpunga, allaffeqarfik suliniuteqarluarpoq, Hans Frederik Olsen (S) oqarpoq.

AAMMA ATUARUK:

Nunaqarfimmi atornerluisoqarnikuunerata kingorna suliniutinik aallartitsisut