Ataatsimut tapiissutit ikilisinnissaat D-p akerlilerpaa

Inuit Ataqatigiit oqallisigitinniarpaa Danmarkimit ataatsimut tapiissutit ukiumut 10 millioner koruuninik ikilisarneqarnissaat isumassarsiatsialaanersoq. Oqallinneq naatsuarakasiussaaq: Akissutissaraa naamik.

Taamatut oqarpoq partiimi naalakkersuisooqataasumi Demokraatini siulittaasuugallartoq Randi Vestergaard Evaldsen.

Ikiliartoreerput

Taassuma tikkuarpaa ataatsimut tapiissutit ullumikkut ikilisarneqalereersut 2009-mi namminersorlutik oqartussanut isumaqatigiissutip kingunerisaanik, isumaqatigiissullu taanna IA-p akuereqqullugu inassutigisimavaa, Demokraatit naaggaaqqullugu kajumissaarisimasut.

Taarsiullugu Demokraatit partii illua'tungiliuttoq kajumissaarpaa aningaasanut politikkimi atituumik isumaqatigiissuteqarnermut peqataaqqullugu.

Akisussaassutsimik tigusigitsi

– Kissaatiginartipparput IA-p annertunerusumik akisussaassuseqarnissaa aaqqissuusseqinnissat pillugit uagut allat suleqatigaluta, tamakkua ingerlattariaqaratsigik inuiaqatigiit pigissaartut attatiinnarnissaannut. Kissaatiginartipparput IA piviusunik siunnersuuteqassasoq nunatta isertitai qanoq isilluni amerlineqarsinnaanersut. Akerlianillu aamma tusarusupparput IA qanoq isumaqarnersoq sutigut aningaasartuutinik sipaaruteqarsinnaanersugut, Randi Vestergaard Evaldsen tusagassiorfinnut nalunaarutikkut allappoq.

Ataqatigiinngitsoq

Tamatuma saniatigut IA unnerluutigaa ataqatigiinngitsumik politikkeqarnerarlugu.

– IA-p ukiortaami oqaaseqaataatigut inerniliissutissatuaavoq inunnut sanngiinnerpaanut aningaasat amerlanerusut atorneqassasut, naligiinnerusoqassasoq, ataatsimut tapiissutit ikilisarneqassasut. Kialuunniit takusinnaassaavaa tamakkua ataqatigiinngilluinnartut, Demokraatini siulittaasuugallartoq oqarpoq.