Ataatsimoorussamik tapiissutini aaqqiissuteqarnerit immikkoortinneqassapput

Tapiisutini qaffariaatit ineriartortitsinernut immikkoortinneqassapput

Naalagaaffimmit ataatsimoorussamik tapiissutit qaffariaat nunap ingerlanneqarneranut atorneqarunnaassapput. Aningaasaqarnermut Naalakkersuisup Pele Brobergip (PN) ippassaq aningaasanut inatsisissatut siunnersuummi saqqummiussaaniallassimavoq.

Killormuanik aningaasat ineriartortitsinermut atorneqassapput. Namminiilivinnissaq anguniagaralugu ataatsimoorussamik tapiissutit atorunnaarsikkiartuaarneqarnissaat anguniagaavoq.

- Danmarkimit ataatsimoortumik tapiissutinik aningaasaqarnikkut pinngitsuuisinnaannginnerup annertusiartortumik qimakkiartorneqarnissaanik anguniagaq anguneqassappat, Naalakkersuisut aningaasaqarnikkut siuarsaataasunik suliniutinik aallartitsinissaannut aningaasat atugassanngortinneqartuartut ilaasa annertuut immikkoortinneqarnissat annertuumik soqutiginaateqassaaq, aningaasanut inatsisissatut siunnersuummi allassimavoq.

Ukiumoortumik akigititanut akissarsianullu aaqqiissuteqarnikkut aningaasartaat politikerinit atorneqarsinnaajunnaassapput. Tamanna 2020-mi aningaasanut inatsimmi atuutilissaaq.

Akigititat akissarsiallu qaffakkiartorusaarnissaat pissutigalugu ataatsimoorussamik tapiisutit ukiut tamaasa appariartorusaassaaq. Taamaammat ataatsimoorussamik tapiissutinik isumalluuteqarunnaariartorneq marlunnik aqqutissiuunneqarnissaa anguniagaavoq. Ilaatigut ineriartortitsinikkut iluanaarutissanik pilersitsinikkut aammalu ataatsimoorussamik tapiissutit nalingata appariartortinneratigut.

Powered by Labrador CMS