oqallinneq
Ataatsimik ukiulimmut anaanaq: Naartusunut imigassartorneq inerteqqutaalersinniarli
- Inuit tamanna oqaluuserissallugu qunugiinnaraat qatsullugulu nikalluutigaara, Naja Carina Steenholdt oqarpoq
- Nuummi arnat naartusut imerniartarfinnit aalakoorlutik anisut takussaasarput. Taakkununnga sassaallerneq inerteqqutaasariaqarpoq.
33-inik ukiulik Naja Carina Steenholdt, ataatsimik ukiulimmik paneqartoq taama oqarpoq.
Naalakkersuisunit inatsisissatut siunnersuut nutaaq Sermitsiaq.AG-p saqqummiunnerata kingorna oqallinnermut ilannguppoq, arnanut naartusunut imigassartortunut imaluunniit ikiaroortunut politikerit pissaanermik atuinissamik kissaateqartut tassani atuarneqarsinnaavoq.
Arnat katsorsartillutik imerusulissappata qimatsinaveersaarneqarsinnaassasut imaluunniit init paarnaarneqarsinnaanerat, siunnersuummi siunertarineqarpoq.
Atuaruk: Naartusut pinngitsaalillugit aalakoornaveersaartinneqartalissapput
- Suliniut pitsaasuusoq isumaqarpunga, kisianni tupigusuutigaara naartutilluni imigassartorneq inerteqqutaallluinnalersinniarneqanngitsoq, Naja Carina Steenholdt oqarpoq.
Meeqqap anaanami naavaniinnerani anaanaasup aalajangernerlunnerinut, taanna naapertorlugu inuiaqatigiit soqutiginninnissartik puigortarpaat.
- Meeqqamut suli inunngorsimanngitsumut tamanna tulluanngilluinnarpoq, Naja Carina Steenholdt Sermitsiaq.AG-mut oqarpoq.
Oqartussat aallaavigisinnaasaminnik inatsiseqareersut taanna isumaqarpoq, taakku soorlu imigassamut innersuutit ilanngullugit aallaaviusinnaanerarpai.
- Naartunermut atatillugu imigassamik aalakoornartulittorneq peqqinnissaqarfimmi aqutsisoqarfiup pinngitsoorluinnarnissaanik siunnersuuteqarfigereerpaa, aamma meeqqanut 15-it ataallugit ukiulinnut imigassamik sassaallerneq inerteqqutaavoq. Anaananngortussat aalakoorsinnaanerat ataqatigiinngilaq, 33-nik ukiulik anaanaq Nuummeersoq oqarpoq.
Taanna naartusunut matumani inatsimmik unioqqutitsisunut pillaateqartarnissaq qunuginngilaa.
- Naartunertik tamaat katsorsarneqartussanngorlugit pineqaatissinneqarlik, Naja Carina Steenholdt oqarpoq.
Naggataatigummi iluaqutaassaaq, taanna isumaqarpoq.
- Meerassagut pitsaanerpaamik atugaqartinniartassavagut, taakkumi inuiaqatigiit ingerlateqqittussaavaat.