aningaasartuutit
Ataatsimiittarfik inoqarpianngitsoq 200 millionit koruunit oqaluuserineqarput
Ukioq kingullermut aningaasaqarnermut inatsimmut tapiliussatut aningaasartuutaasimasut Inatsisartut akuerissavaat. Tassani 200 millinit koruunit amigaatoorutaasimallutik.
Ullumi Inatsisartut ukioq kingulleq aningaasaqarnermut inatsimmi tapiliussatut eqqartuisoqarnerani qinikkanit soqutigivallaarneqarsimanngilaq.
Aningaasaqarnermut Naalakkersuisoq, Aqqaluaq B. Egede (IA), tapiliussatut aningaasartuutinik saqqummiussinerata nalaani, ataatsimiittarfimmi allaat inuit pingasuinnaasimapput.
Aningaasat atorneqareersimaneri allanngortinneqarsinnaannginneralu pissutaaqataasinnaavoq.
Taamakkaluartoq ukioq kingulleq aningaasat atorneqarpallaarsimasut ikitsuinnaanngillat. Ataatsimut isigalugu amingatoorutit 60 mio koruuninit 260 mio koruuninut qaffariangaatsiarsimapput.
Aningaasanik atuivallaarsimaneq Namminersorlutik Oqartussat Kalaallit Airportsimut 200 mio koruuninik aningaasaliisimaneranik nassuiaaserneqarsinnaavoq. Decemberip qaammataani suliffeqarfimmut 94 mio koruuninik aningaasaliisoqaqqippoq, tassanilu anigaasat atukkiunneqarsimapput utertinneqartussanngorlugit. Taamaasilluni suliffeqarfinngortumut katillugit 294 mio koruunit aningaasaliissutigineqarsimallutik.
Taakku tapiliussatut aningaasartuutit aningaasaqarnermut ataatsimiititaliamit suliarineqarlutillu akuerineqassapput, kingornalu Inatsisartuni ataatsikkut suliarineqassallutik.
Tapiliussatut anigaasartuutit siunnersuut akerleriissutaanngitsumik akuerineqarluni anigaasaqarnermut ataatsimiititaliamut ingerlateqqinneqarpoq.