Ataatsimiititaliap isumaqatigiissup Nivi Olsen isornartorsiorpaa

Atuarfeqarfik tamaat piviusumik iliuuseqarfiginissaa kissaatigaarput, atuarfiit ataasiakkaat angusaqarnerlunnerat pissutigalugu tikkuartuinani.

Inatsisartut Kulturimut, Ilinniartitaanermut, Ilisimatusarnermut Ilageeqarnermullu Ataatsimiititaliaannisiulittaasoq sapaatiummat taamatut kajumissaaruteqarpoq.

Akisussaassuseqanngitsumik isornartorsiuineq

– Ataatsimiititaliap ajuusaarnartutut isigaa nunami ilinniartitaanermut naalakkersuisup nunami oqaluttarfiit pingaarnersaannit meeqqat atuarfiat ataaseq aalajangersimasoq uparuartormagu, nammineerluni akulerunniannginnguatsiarluni. Taamaattumik ataatsimiititaliami isumaliutigaarput Nivi Olsen (D) isumasioqatiginissaanut qaaqquniarugu, Vivian Motzfeldt (S) allappoq.

Taamatut inassuteqarnermut pissutaavoq oktobarip 14-ianni Inatsisartut ataatsimiittarfianni Olsenip oqaaseqaataa, tassani Narsap Atuarfiani angusat pitsaanngitsut atuarfimmik ingerlanerlutsitsinermik assersuutitut taammagit.

Akuerineqarsinnaanngitsoq

Kingorna ataatsimiititaliami ilaasortamut allakkatigut aakissummini Nivi Olsenip oqaatigaa atuarfiup ingerlanneqarnera namminersorlutik oqartussat akisussaaffiginngikkaat kommunilli akisussaaffigigaa - taamatut oqarnera ataatsimiititaliami ilaasortat narrujuummissutigaat, politikeri Siumumeersoq, ataatsimiititaliami siulittaasuusoq, nassuiaavoq.

– Naleqquttumik peqqissaarnermullu takussutissaava Naalakkersuisunut ilaasortap nunami oqaluttarfiit pingaarnersaannit atuarfimmi aalajangersimasumi pissutsit akuerineqarsinnaanngitsutut oqaatigimmagit, tamannali peqatigalugu atuarfimmut pineqartumut nakkutilliisutut pisussaaffimminik naammassinninniarumarpasigani, Vivian Motzfedt aperivoq.

Iliuuseqarusupput

Taanna nassuiaavoq ataatsimiititaliap isumaqatigigaa meeqqat atuarfianni angusarineqartartut appasippallaartut, atuarfinnilli allanit ajornerusutut tikkuartuineq pinnagu maanna politikkikkut aalajangiisitserusullutik atuarfimmik pitsaanerulersitsisinnaasumik.