Ataatsimiititaliap aalisakkanut akitsuutit ernumanartoqartippai

Aalisarneq nutaamik akitsuummik, isumalluutinik atuinermut akitsuummik taallugu, eqqussisoqarniarpoq, tassani aalisartut tamarmik tapersiinissaat eqqarsaatigineqarpoq.

Siunnersuut 4. oktober Inatsisartunut siullermeerluni saqqummiunneqarpoq. Oqaatigeriikkatsituulli, pingajussaaneerinnginninnermi Naalakkersuisut piffissaq kingullerpaaq atorlugu allannguutisssatut siunnersuummik saqqummiussaqarput.

Naatsorsuutit eqquutissappat?

Allannguutissatut siunnersuutip kingunerissavaa, sinerissap qanittuani aalisakkat arlallit akitsuusersorneqassanngitsut uiluiillu 5 procentimik akitsuuserneqassasut.

Taamatulli periuseqarneq akileraartarnermut aningaasaqarnermullu ataatsimiititaliamit iluarineqanngilaq.

- Tassunga atatillugu allannguutissatut siunnersuutip kingusissukkut saqqummiunneqartup ingerlanneqarsimanera tamatumanilu naatsorsuinermi periutsip tunngavigineqartullu patajaassusia ataatsimiititaliamit eqqarsarnartoqartinneqalaarput, ataatsimiititaliaq isumaliutissiissummi allappoq

- Sinerissamut qanittumi saarullinniarnerup. saattuarniarnerup nipisaallu suaannik aalisarnerup akitsuuserneqannginnissaat pillugu naapertuussinnaammat ataatsimiititaliamit maluginiarneqarpoq, ataatsimiititaliaq allappoq.

Ataatsimiitialiarlu isumaqarpoq, inatsissatut siunnersuummi anguniagaq attatiinnarneqarsimasariaqarluartoq, tassa aalisarnermik akuersissutaatillit tamarmik tapeeqataanissaat.

- Tamanna assersuutigalugu pisinnaagaluarpoq aalisarnerup suulluunniit tunngavimmigut akitsuuserneqarneratigut, tamatumalu kingorna aalisakkat siuliani taaneqartut ilaatinneqanngittussat pillugit aalajangersakkamut ilanngunneqarsinnaagaluarlutik, ataatsimiititaliaq Naalakkersuisut siunnersuutaat 'teknikikkut aaqqiissutaasutut' isigalugu, isummerput.

Aalisakkanut akitsuut aalisarnermullu inatsit

Aalisarnermut inatsimmi kingunissai ilisimatinnagit akitsuutinik qaffaanissaq ataatsimiititaliamit ernumassutigineqareersimavoq. Isumaliutissiissummilu nutaami ataatsimiititaliap mianersoqqussuteqarnini uteqqippaa.

- Allannguutissatut siunnersuutikkut akitsuutit ataatsimut isigalugu qaffanneqaqqimmata pingaamertut siunnersuut matumani pineqartoq pillugu 3. november 2017-imi isumaliutissiissut kiisalu 11. november 2017-imi ilassutitut isumaliutissiissut ataatsimiititaliamit innersuussutigineqassapput, taakkunani aalisarnermut inatsisissap kingunerisassai ilisimanagit akitsuuseeriaatsimik nutaamik atuutilersitsineq ilutigalugu akitsuutinik qaffaaneq ataatsimiititaliamit eqqarsamartoqartinneqarluni, isumaliutissiissuummi allassimavoq.

Ataatsimiititaliamilu amerlanerussuteqartut siunnersuummut tapersiipput.