Ataatsimiinnermit assit takukkit: Randi Vestergaard oqallinnermut kulturimik nutaamik ujartuivoq

Sooruna Kalaallit Nunaanni aningaasaqarnikkut aaqqissuusseqqinnissaq taama ajornakusoortigisoq?

Aningaasaqarnermut naalakkersuisoq, Randi Vestergaard Evaldsen (D), Nuummi Arctic Circlemi ataatsimeersuartoqarnerani oqalugiarnermini misissueqqissaarnini saqqummiuppaa.

Atuaruk: Arctic Circle Nuummi ingerlanneqassaaq

Unammilligassaq annerpaaq
Kalaallit Nunaata unammilligassaani annerpaaq taassuma tassaanerarpaa, aningaasaqarnikkut aaqqissuusseqqinnissanik naammassinninnissaq - taamaalilluni siunissami nungusaataanngitsumik toqqammaveqartumik aningaasarsiornermik qularnaarisuussammat.

Tamannali maannakkut naalakkersuisoqatigiinnut imaannaanngilaq, aaqqissuusseqqinnernik oqariartuutinik piviusunngortitsineq ajornakusoortarmat, politikeri naqissusiivoq.

Nanortalimmit Qaanaamut
- Namminersornerulluni Oqartussaanerup eqqunneqarnerata kingorna aningaasaqarnikkut nalunaarusiat iliorarutsigit, taakku kujataani Nanortalimmit avannamut Qaanaaq angullugu takissuseqassagunarput. Tamannalumi ajornartorsiutaavoq, ilaami kissaatigineqartutut piviusunngortinneqartarput. Ilaat ingerlanneqanngitsoortarput. Tamanna ajornartorsiutaallunilu ajuusaarnarpoq. Tamanna akissaqartinngilarput Randi Vestergaard Evaldsen oqalugiarnermini oqarpoq.

Taannalu aaqqissuusseqqinnernik piviusunngortitsinissamut ajornakusoortitsisunik, nammineq tunngavinnik pingasunik tikkuartuivoq.

Atuaruk: Arctic Circlemi ataatsimiinnermi puisit amiinik pilerisaarinissamik siunnersuuteqartoq

Ikinnerussuteqartut oqallinnermi takussaanerusut
Naalakkersuisut siunnersuummik inuiaqatigiinnik tamarmiusunik iluaqutaasussamik saqqummiussigaangata, tamanna ilaatigut inuiaqatigiinni ikinnerussuteqartut aningaasatigut iluaqutaannik piiaanernik nassataqartarpoq. Eqimattat taakku iliuuserineqartunik naapertuilluanngitsumik eqqugaanertik amerlanertigut iluatsittumik saqqummiuttarpaat. Taamaattoqarneranilu amerlanerussuteqartut nipangersimaannartarput.

Taakku eqqugaasut oqalliseqatigalugit akerlilerneq ajorpaat. Naggataagullu tamanna tusagassiuutini naapertuutinngitsumik saqqummerneranik inerneqartarpoq.

Iluaqutinik annaasaqartoqarusunngilaq
Nunatut Kalaallit Nunaattut angitigisumi innuttakitsumilu, illoqarfiillu nunaqarfiillu akornanni aqqusineqanngitsumi, siunnersuutit saqqummiunneqarneranni kikkut pissarsinissaat kikkullu annaasaqarnissaat takujuminartorujussuusarpoq. Tamatumalu nutarterinerit ingerlanneqarsinnaanerat ajornarnerulersittarpaa, tunngaviusumimmi inuiaqatigiinnimi eqimattat arlaannaalluunniit iluaqutinik pisinnaatitaaffimmissut isigisaminnik annikillisaavigineqarnissartik isumaqataaffigineq ajorpaat.

Tusagassiuutit eqqornerlunneqartut saqqummiuttaraat
Tusagassiuutit inuit eqqornerlunneqartut atugaannik saqqummiussisarput, taamaaliornerminilu inuiaqatigiit tamarmiusut iluanaarutaat saqqummiunneq ajorpaat. Taamaammallu kattuffiit politikerillu nutarterinerup immikkoortua taanna inuiaqatigiinni ikinnerussuteqartuni atukkanik ajornerulersitsisoq aallaavigilersarpaat.

Taamaalillunilu tamanna innuttaasut tamarmik taamatut isumaqarnerattut isikkoqartineqalersarpoq, tamannalu nutarterinermik siunnersuutit piviusunngortinniarneqarnerannut aporfiulersarpoq.

Suliassartik suliariinnaraat
- Assersuutitut taasakka tusagassiorfinnik, soqutigisaqaqatigiinnik politikkerinilluunniit illuatungiliuttunik isornartorsiuinerunngillat. Taakkumi isumagisassatik isumagiinnarpaat. Taakkuli inuiaqatigiinni nutarterinissani pingaartuni, siunissami qanittumi inuiaqatigiinnik patajaallisaasussatut siunertaqartuni, ingerlatassatsinni unammillernartut ilaannut assersuutissaaginnarput. Aporfissiuinerit taamaattut ingerlaannassappata, kikkut tamarmik mianersoqqussutigisaattut inisserataannaavugut, tassalu: Pissutsit taamaaginnartinnissaat periarfissaanngilaq, Naalakkersuisunut ilaasortaq oqalugiarnermini naqissusiivoq.

Allaaserisap ataani ataatsimeersuarnermit assit takukkit