innarliineq
Ataataasoq: Paninnut pinerluttoqarpoq
Inarliinneq ingerlaatinneqalerpat, politiinut unnerluutiginninnissaminut piareersimavoq
- Paninnut tunngatillugu nikallungaqaaga, innarliinernummi taamaattunut massakkut ukiuinut naleqqiullugu kingunerlutsitserujussuarsinnaavoq.
Ullumi nivisiaqqamut kivilertittumut kingornalu assilisaarneqartumut, ataataasoq taama oqarpoq.
Taassuma pania eqqarsaatigalugu atimi taaneqannginnissaa, ataataasup orniginartinneruaa.
Aamma atuaruk: Innarliinerit soraarummernermik taamaatitsisoq: Niviarsiaraq kivilerneqartoq
Tallimigut tilluusaqartoq
Pania angummuminut sianerniarsarinerata nalaani, taanna oqarasuaatikkut oqaluussisimavoq. Ilimmaguli, nuliata isumatsassimaaqaluni innarliineq pillugu oqaluttuussimavaa. Ataatasoq pinasuartumik Ukalisap Atuarfianukarsimavoq.
- Pisoq atuarfiup qujanartumik pimoorullugu iliuuseqarfigipallassimavaat, taanna oqarpoq.
- Pisoq nukappiarapiluusaarnerunngilaq, paninnut pinerlunneruvoq.
- Tape-mik aalajangersorsimavaat, kivileriarluguli arlalinnik assilisaqattaarlugu. Aalajangersorneqarnermini tallimigut maanna tilluusaqarpoq.
- Kanngusussanngilatit
Ataataasup panini politeeqarfimmi ilagivaa, tassani pisoq unnerluutigineqarpoq niviarsiararlu apersorneqarluni.
- Panimma kammalaatimi saavanni taama kanngutsaatsuliorfigineqarnini kanngungisorujussuuaa. Kanngusussanngitsoq oqarfigaara, taakkuli kanngusuttussaasut. Illit kukkussuteqanngilatit, taanna oqarpoq.
- Taama oqarnissaq ajornanngitsuaraavoq, taannali qanoq misigisimanersoq allaaneruvoq, ataataasoq unillatsiariarluni ilassuteqarpoq.
Assit ingerlaatinneqalerpata, politiinut unnerluussiniartoq
Taassuma atuarfimmi soraarummeerluni nuannaarutigineqartarnera ajorinagu Facebookimini allaaseraa.
- Suli taama isumaqarpunga. Pisorlu soraarummeernermut attuumassuteqanngilaq.
- Killissamimmi qaagiinerujussuuvoq.
Atuartulli panimmi kanngutsaatsuliorfigitinnerata nalaani assinik ingerlaartitsilertut ersarilluinnartumik erseqqissaateqarfigai.
- Taakku politiinut unnerluutigineqassapput. Soqutiginngilarali qanoq amerlatigisunik unnerluussissangaluaruma, ataataasoq oqarpoq, kamaqqaqalunilu pakatseqqavoq, paninilu pillugu aliasunneruvoq.