Assit: Silap nillataarnerani pølsit kissalaartut
Inatsisartut mittarfissualiornissanut atatillugu pingajussaarinninnerannut atatillugu Kommuneqarfik Sermersooq aqqqissuussaqarpoq
Naak sila nillataaraluartoq Nuummi najugaqartut pølsinik kissalaartutornissamik periarfissinneqarput.
Mittarfissualiornissamut inatsisissamut Inatsisartut pingajussaaneerinninnerat atatillugu Kommuneqarfik Sermersooq taama aaqqissuussaqarpoq.
Pølsit 500-t missaanniittut Inatsisartut allaffiata eqqaanni sassaalliutigineqarput kiisalu Simon Lynge aamma Rita Malu Falck-Pedersenilu aliikkusersuillutik.
Aaqqissuussamut peqataasut Sermitsiaq.AG-mit oqaloqatigineqarput:
Aggu Christensen: - Maani peqataalluni nuanneqaaq, tassami inuit qiimallutillu qungujulapput. Kisianni mittarfissualiornissanut inatsisissaq apeqqusernartorujussuutippara, tassanimi USA aamma Danmarki peqataatinneqalerput. Nunatta namminiilivinnissaa ungasilliallassasoq isumaqarpunga. Namminiilivinnissaq pingaarnerpaajusussaagaluarpoq. Allamik isumaqaraluarlunga maani akuuvunga, aamma pølsit suliarineqarluarsimasut mamarput.
Julie Nielsen: - Aaqqissuussaq nuanneqaaq. Mittarfissualiortoqarnissaanut isumaqataalluartuuvunga, sukkanerusumilli suliarineqarsimasinnaagaluartoq isumaqarlunga. Politikerit sukkanerusumik suliarisimasinnaagaluarpaat - oqallinnerpassuit pisimanngitsuuppata immaqa naammassereersimassagaluarpoq maani mittarfissaq. Kiisami maannakkut piariilerpoq.
Philip M. Josefsen: - Aaqqiissut pitsaanerpaanngilaq. Nuussuarmi najugaqartunut nipitoorujussuusassaaq, aamma Narsarsuarmi Kangerlussuarmilu najugaqartunut una eqquissaaq, nuuttariaqalersinnaallutik. Politikerit sukkavallaartumik una suliaraat, innuttaasut peqataatinneqarnerusimasinnaagaluarput.
Miki Pedersen: - Aaqqissuussamut isumaliutissaqanngilanga, mittarfinnut tunngasunut oqallinnerit aamma malinnaaffiginikuunngilakka. Pølsinik sassaalliisoqarmat maanngarpunga. Mittarfissuaq pitsaasuussappat ajussanngilaq, kisianni innuttaasunut akisussappat akerliussaanga.
Nukaaraq Hammeken: - Aaqqissuussaq ajunngilaq. Uanga angalasorsuunngilanga, kisianni mittarfissualiornissamut tunngatillugu aalajangiunneqartussaq qularinikuuara, tassami angalasussarpassuarnut aningaasaleeqataassaanga naak uanga angalasorsuunngikkaluarlunga. Neriuppunga angalanermut akit akikillissasut.