Pinngortitami assilisat
Assit: Egevang kusanartunik assileeqqittoq
Pinngortitami assiliisartoq Carsten Egevang Ilulissani aalisartut marluk qaammammi uani malinnaaffigai. Assilisai takukkit
Carsten Egevangip assilisani 'Ice Cold Harvest'-imik atsersimavai. Ilulissat eqqaani aalisartut assilivai, assit qernertumik qaqortumillu qalipaateqarlutik.
Aalisartut Kim Hansen aamma Ringo Mathiassen assiliisup malinnaaffigai. Motoritalinnik angallattoqaqqusaanngimmat qimusserlutik aalisarfissartik tikippaat.
Aalisarneq pingaartillugu assiliineq ingerlanneqarpoq, nutaarpalaartumik assiliinikkut takutinniarneqarluni susoqarnersoq.
- Assilisakka nalinginnaanngitsuussasut aalajangersimavara, Ilulissat assilineqartarnerasut isikkoqannginnissaat anguniarlugu. Qimussit sullisigineqarput, takornarianummi kisimik atortussiaanngillat. Naak assit kusanaraluartut Ilulissani aalisartuuneq imaannaanngitsuuvoq, 25-mmi ataallugit ilaatigut ississuseqalersinnaavoq, Carsten Egevang oqaluttuarpoq.
Great Barrier Reef aammaYellowstone National Park
Ilulissat kangerluat ukiumut takornariarpassuarnit tikinneqartarpoq, Unescomit eqqissisimatitaalluni. Eqqissisimatitaanera Carsten Egevangip naleqquttuusorivaa, allaat Great Barrier Reef Australiamiittumut aamma Yellowstone National Park USA-miittumut nallersuullugit.
- Takornarissat ilisimaneq ajorpaat aamma takusartik suliffigineqartartuusoq - suliffik nunarsuarmi kusanarnerpaajugunarpoq. Qaleralinniarneq pingaarnertut ingerlanneqartarpoq, umiatsiaaqqamik imaluunniit ukiakkut qimussimik qaleralinniartoqartarluni. Aammali puiserpassuaqarpoq, nunamilu ukallit aqissillu aamma pisarineqartarlutik, Carsten Egevang oqaluttuarpoq.
Assit ataani takukkit - assilineqarsimasut allat aamma uani takuneqarsinnaapput