pilluaritsi
Assit: Ukioq manna nannuttarineqartoq siulleq
Nanoq Narsarsuup Mittarfiata eqqaaniittoq piniartumit inuusuttumit pisarineqarpoq
Sebu Kaspersen ataatani Hans ilagalugu Tunulliarfiup kangerluani Qinnguata eqqaanniillutik qaleralinniarput.
Nalunaaqutaq ullup qeqqata missaani Sebup nanoq Qassiarsuup eqqaaniittoq siumorpaa, Narsarsuup Mittarfiata ungasinngisaaniittoq.
Nanoq ornikkamikku qaqqap tungaanut qimaavoq, Sebu oqaluttuarpoq. Naak aput maakkarnaraluartoq nanoq malersuinnarpaa, sivitsulaaleertorlu nanoq qanilligamiuk eqqorsinnaasimallugu.
Nanoq ammukaappaat umiatsiaaqqaminnullu ilillugu Narsaliaallugulu. Angerlarsimaffinnukaateriarlugulu nanoq pilallugu.
Nannuttoqarsimanera illoqarfimmiunit tusarneqarpoq, inuppassuillu pisarineqarsimasoq tikilermat takusarlugu. Nanoq peqqittuusoq ilisimasalinnit oqaatigineqarpoq sisamat missaanik ukioqartoq, aqajaruali imaqarsimanngilaq.
Ilaqutariinni Sebu kisimi nannunnikuunngilaq, ataataa Hansi aamma nannumik angeqqatipajaavanik pisaqarnikuuvoq ukioq 2000-tinngoriitsiaannartoq.