Nordatlantisk hus
Assit: Tupinnartoq, alutornartoq nuanneqisorlu
Sapaatip akunnerata naanerani inuit 5.000-t Odensemi umiarsualivimmiissimapput Nordatlantisk Husip ammarneqarnerani peqataajartorlutik
– Soorunami naatsorsuutigisimavarput inuppassuarnik takkuttoqassasoq, 5.000-illi missaanniittut takkunnissaat naatsorsuutigisimanngilarput. Taamaattumik oqaaseq naleqquttutuaq eqqaasinnaasara tasaavoq tupinnartoq, alutornartoq nuanneqisorlu, Nordatlantisk Husimi kulturimik paasissutissiinermillu sulialik Annette Lyberth nuannaaqisoq sapaatiummat ualikkut suut tamarmik naammassingajalersut Sermitsiaq.AG-mut oqaluttuarpoq.
Aamma atuaruk: Nordatlantisk Husip nalliuttorsiorpalaartumik ammarnersiorneqarnera
– Tamatumunnga peqataalluni misigisaq nuannersimaqaaq. Soqutiginnittoqartorujussuuvoq tamannalu siunissamut isumalluartitsivoq. Suliniummi tupinnaannartumi piumassutsiminnik suleqataasut 100-uusimapput. Assersuutigalugu iikkami tippiliamik nuersakkamik. Qimusseq ilanngullugu mersuunneqarsimasoq. Iikkami tippiliaq patchwork-ersuaq puisip amianik sisamanik teqeqqulinnik katitigaq. Soorunalumi erinarsoqatigiissuit 70-t missaannik ilaasortalik.
Annette Lyberth Nordatlantisk Husip siunissaa pillugu isumalluartorujussuuvoq nangillunilu:
– Aallartilluarsimavugut tamannalu ingerlaannassaqqaarepoq. Isumaqarpunga Nordatlantisk Hus neriniartarfillu Nordatlanten aaqqissuusisarnissallu allat qilanaarisavut pulaarneqartartorujussuussasut. Aqagu unnukkut, tassa ataasinngornermi, Foreningen Norden taarsiarsaalerneranik taaneqartumik aaqqissuusseriissaq, tassani Syddansk Universitetimi lektori Morgens Davidsen nunani avannarlerni ukiuusarnera pillugu oqalugiassalluni.
– Maannangaaq malugisinnaavara Hunderupvejimi illuutitoqqatta anersaavisa ilarujussui nooqatigisimallutigit, Annette Lyberth Sermitsiaq.AG-mut oqarpoq.