Nannut angalasarnerat

Assit: Tunumi nannut ilisimatuunit malinnaaffigineqarsinnaanngorput

Pinngortitaleriffimmi ilisimatuut nannut nunatta kujataata nalaaniittut malinnaaffigineqarsinnaanngorpaat

Peter Hegelund - Pinngortitaleriffik Kristin L. Laidre - Pinngortitaleriffik Kristin L. Laidre - Pinngortitaleriffik Peter Hegelund - Pinngortitaleriffik Kristin L. Laidre - Pinngortitaleriffik Kristin L. Laidre - Pinngortitaleriffik Peter Hegelund - Pinngortitaleriffik

Tunup kujataatungaata imartaaniittut nannut arnavissat qulit iluatsilluartumik qaammataasanut nassitsissutilerneqarput qungasequtsersorneqarlutik, allallu angutivissat inersimasut inuusukaajunerusullu siutaasigut mikisunnguanik nassitsissutilersorneqarput.

Pinngortitaleriffik tusagassiutinut nalunaaruteqarpoq.

Taamatut upernaajunerani nannunik nalunaaqutsersuinerit aatsaarpiaq pipput. Taamaalilluni aamma ilisimatusartartut Pinngortitaleriffimmeersut siullermeersumik nannunik Tunumiittunik ingerlaariaasiinillu qaammataasakkoortumik malinnaaffiginnissinnaanngorput.

Pinngortitaleriffimmeersut ilisimatusartartut seniorforsker Kristin L. Laidre siulersortiliullugu ulluni makkunani Tunup kujasinnerusortaata imartaani nannunik nalunaaqutsersuileruttorput. Kuummiut aallaavigalugu ilisimatusartartut martsip 21-aniit 18. april tungaanut nannut pillugit suliniuteqarniarput.

Tunumi nannut kisinneqarsimanngisaannarput, kisiannili nassitsissutit nannunut maanna ikkussuunneqartut iluaqutsiullugit Tunup sineriaa atuarlugu nannut ingerlaartarfiisa paasisaqarfigilluarnissaat anguniarneqarpoq.

- Tamanna anguneqarpat nannut Tunumiittut illersorneqarsinnaasumik tunngaveqarluni kisinneqarsinnaanissaat pilersaarusiorneqarsinnaalissaaq. Paasissutissat pissarsiarineqartussat Tunumi nannut pillugit biologit siunnersuisalernissaannut, qularnanngitsumillu tappavani nannunniartarnerup aqunneqalernissaanut atorneqassapput, Pinngortitaleriffik ilisimatitsivoq.

Nannut uku aallaanissaat mianersuutigineqassaaq
Qaammataasanut nassitsissutit nannunut qungasequtsiunneqartut immikkut tamarmik 150.000 koruunit missaannik akeqarput, taamaattumillu nannut nassitsissutilerneqarsimasut pisarinaveersaarnissaat pingaartuuvoq. Nanoq nassitsissutilerneqarsimasoq timimigut qalipaammik erseqqilluinnartumik normuligaasarpoq.

Taanna qaammatit marluk missaanni atasarpoq, taamaalilluni biologit nannunniartartullu nalunaaqutsigaasimasumik ilisarsisissinnaalerlugit. Normuliussat nanup timaani ersilluartarput, aappaluttuullutik. Nannut qaammataasanut nassitsissutilerneqarsimasut qaqortumik qungasequtsigaasarput, allallu arnavissat angutivissallu siutimikkut nassitsissuteeraligaasarput siggummikkullu kakiorneqartarlutik.

- Nanorli nalunaaqutsigaasimasoq pisarisoorsimagaanni Pinngortitaleriffimmeersut erngertumik attavigineqassapput. Nalunaaqutserneqaqqammersimasup neqaa nalunaaqutsigaaneraniit qaammatit marluk iluini nerineqassanngilaq, Pinngortitaleriffimmit ilisimatitsissutigineqarpoq.

Qaammataasakkut nassiussisinnaasut
Nanoq ilisimajunnaarsinneqaraangami nalunaaqutsigaasarpoq qaammataasanullu nassitsissutilerneqarluni. Uuttortarneqartarpoq misissugassanillu tigusiffigineqartarluni. Nassitsissuteeqqat siutaannut ikkunneqartartut ukiup affaa tikillugu atasinnaasarput, qungasequtsiullugillu nassitsissutit ukiut arlerlugit atasinnaasarput.

Nanoq nalunaaqutseqqammerneqarsimasoq pisarigaanni paasissu-tissarpassuugaluartut nannup ingerlaartarfiinut uninngaartarfiinullu tunngassuteqartut ilisimatusartartunit pissarsiarineqartussaagaluartut ukiunilu arlalialunni katersorneqartussaagaluartut annaaneqartarput.

Pilersaarutaavortaaq Pinngortitaleriffimmeersut aappaagu upernarnerani Tasiilap eqqaanissaaq nannunik nalunaaqutsersuinissaat.

Assit pingasut ataani takukkit

Powered by Labrador CMS