Assit takukkit: Qinersineq aallartippoq
Qinersisartut partiillu siuttui ullaaq manna Nuummi Nuup Timersortarfissuanut ingerlaaqatigiipput
Ullaaq nalunaaqutaq qulingiluanut qinersineq aallartippoq. Tamatuma siuliani qinersivimmi nakkartitsiviit misissorneqarlutillu takutinneqarput.
Qinersiviit katillugit 72-iupput.
Nuummi Nuup Timersortarfianut 12.941-nik qinersisinnaasoqarluni qinersiviit anginersarat. Tassani qinersisinnaasut 31 procentii qineqqusaartut akornanni qinersisinnaapput. Qinersisartuni sinneruttut 69 procentit qinersivinnut allanut 71-inut agguarneqarsimapput. Taakkunani Qeqertat Qaanaap eqqaaniittoq, Kangerluk Qeqertarsuup eqqaaniittoq Qassimiullu Qaqortup eqqaaniittoq 18-inik, 20-nik aamma 20-nik qinersisinnaasoqarlutik qinersiviit mikinersaraat.
Partiit arfineq-marluk qineqqusaartullu 232-t
Qinersisoqarnerani aatsaat partiit arfineq-marluk qineqqusaarsinnaasutut akuerineqarsimapput, Inatsisartunullu 31-nut inissaqartumi katillugu 232-t qineqqusaarput. Nunamut Namminermut Immikkoortoqarfik Qinersinermut Ataatsimiititaliamut allattoqarfiuvoq qinersinerullu ingerlanneqarnerani akisussaasuulluni. Nunamut Namminermut Immikkoortoqarfiup, suliffeqarfik Kimik IT suleqatigalugu, qinersineq.gl (valg.gl) atorlugu tamanit malinnaavigineqarnissaa suliarissavaa. Tassa kommunit qinersisunik kisitsereerlutik ikkussinerat malinnaavigineqarsinnaassaaq. Qinersivinni kisitsinerit naammassineqartillugit Qinersinermut Ataatsimiititaliamit akuerineqartillugit kisitsit qorsummut inissinneqartassapput. Soorunami uani quppernermi aamma malinnaasoqarsinnaavoq, qinersinerummi naammassineqarnissaata tungaanut nutarterisoqartassaaq – aamma aqagu ullaakkumiit.
Nunamut Namminermut Immikkoortortap ilisimatitsissutigaa, takorlooreerneqarsinnaanngitsoq, inernerugallartut marlunngornermi unnuap qeqqannginnerani imaluunniit unnuap qeqqareernerani pingasunngorninngortoq pigineqalissanersut.