Skip to main content

Assit takukkit: Qineqqusaartut amerlaneri nalorninermik pilersitsisut

Sisimiuni qinersivimmi Taseralimmi inatsisartunut qinersiartortut kingullermik qinersinermut sanilliullugu ikinnerusut.

Taseraliup silataani Demokraatit Siumullu illiuaqqanik sarfalinnik inissiisimapput, ullorlu naallugu illuaqqat iluini kaffiliorlutillu tiiliortoqarsinnaavoq.

- Assigiinngissutigaarput uagut nammineq generatoreqaratta sarfaliortumik, inuiaqatigiit akiligaannik qineqqusaassannginnatta, Demokraatit tunuliaqutaralugit sassartoq Bo Martinsen ikasalaarluni ilumoorsaalaarlunilu illuaqqat assigiinngissutaat pillugu oqarpoq, nassuiaallunilu pisortat pigisaannut innaallagiamut ikkuffimmut atassusersimanatik.

Partii Naleraq aamma Inuit Ataqatigiit containereeqqanik sanileriinnik ammaasimapput, Atassutikkut nerrivimmik issiavittalimmik atuisut.

Taakkunani tamani kaffi, tii, kaagit, sukkuaqqat, partiillu ilisarnaataannik assitalersukkanik balloninik, saqqarmiuusanik, erfalasuaqqanik assigisaannillu qinersisartunut sassaalliuteqarput.

Upernaarpalaarluni aassaammik nittaappoq, nikorfalertoraannilu kamiit masallutik isigaalernarsinnaalluni.

Taseraliup iluani qinersivimmi qinersisartut nal. 9.00 takkussimasut Inatsisartunut qinersinermut kingullermut sanilliullugit ikinnerit takkussimapput, qinersinermi aqutsisup Juaannannguaq Jensenip qinersisartut tikilluaaqullugit nakkartitsiviit imaqannginneri takutippai, qinersiviullu ammarnera nalunaarutigalugu.

Nal.10-nut, 11-nut 12-nullu qinersiartorsimasut kisinneqarneri naapertorlugit, Sisimiuni qinersisartut Inatsisartunut qinersinermut kingullermut sanilliullugu ikinnerit takkussimapput

- Partiit arfineq marluk aatsaat taama amerlatigisunik qineqqusaartitaqarneri immaqa peqqutigalugit qinersisartunik nalornisitsinermik kinguneqarsimapput, Juannannguaq Jensen eqqoriaalluni naliliivoq.

- Ualip tungaanut periarfissaqarput aalajangernissaminnut, neriunniarta qinersiartortut ullup ingerlanerani amerlanerulerumaartut, Juaannannguaq Jensen qinersivimmi aqutsisoq oqarpoq.

Sisimiormiut qineqqusaartut

Sisimiormiut Inatsisartunut qineqqusaartut tamangajammik Taseralimmi ullaarnaniit takussaapput. Inuit Ataqatigiinnit Juliane Enoksen, Erneeraq Poulsen, Palu Christensen, Sofie Dorthe R. Olsen, Demokraatinit Rachel Ingemann aamma Bo Martinsen, Siumumit, Erik Jensen, Hermann Berthelsen, nuliariit Evelyn aamma Rasmus Frederiksen, Partii Naleqqamiit Ulrik Maki Lyberth Atassummiillu Malu Ostermann takussaasut ilagaat.

Partiit assigiinngitsut inuusuttai nuannaarlutik ataatsimuualaarput.

- Aatsaat taama inuusuttut amerlatigisut qineqqusaarlutik sassarput, Demokraatit inuusuttaanni siulittaasoq Nadia Olsen Inuit Ataqatigiit aamma Atassutip inuusuttai nikorfaqatigalugit oqarpoq.

- Immitsinnut kaammattullaqqillutalu ataatsimuualaallaqqipput naak partinit assigiinngittuneeraluarluta, isumaqatigiillutik nassuiaapput.

- Amerlasuutigut isumaqatigiittangaaratta partiitta suunera ersigunnaangajattarporluunniit, Inuit Ataqatigiinnit Erneeraq Poulsen qungujulluni Nadia Olsenimut qiviaataa oqarpoq ikasaatigalunilu nangippoq:

- Kisianni illiunngitsoq, Erneeraq Poulsen illarluni oqarpoq.

- Politkkkimi aallartippugut akissussaaffimmik tiguseqataarusulluta aamma allanngueqataarusulluta, Atassummit Malu Ostermann oqarpoq.

- Nuannerpoq sassaarluni qineqqusaarluni, inuusuttuungatta nukissaqarluarluta akisussaaffimmillu tigusinissamut piumassuseqarluta, Nadia Olsen oqarpoq nassuiaallunilu demokraatit inuusuttaannut qangali ilaasortaalersimalluni.

- Randi siulittaasuungallarmat soqutiginnillunga ilannguppunga.

Malu Ostermannip tapersersortini ikinngutinilu unnugu neriartornissamut qaaqqusimasani peqatigissavai, Erneeraq Poulsenip Inuit Ataqatigiit kateriffianni Tuapannguit festisalianni peqataassaaq Nadia Olsenilu Nuummut unnugu timmisartussaaq, apuutiaassangunilu demokraatit kateriffianni peqataassalluni.

Hermann Berthelsen nuliani Nuka Olsen qinersivimmi ataatsikkut taaseqatigaa, inatsisartunullu siullerpaamik aatsaat qineqqusaarluni.

- Malugisinnaavara iluaqutigalugu kommunalpolitikkimik misilittagaqarnera, Hermann Berthelsen oqarpoq nassuiaallunilu kommunit inuillu qanutut sullinneqarnissamik pisariaqartitsinerat taamaasilluni ilisimasaqarfigilluarlugu. Sisimiut avatanni qineqqusaariarsimanngilaq, pitsorlunnini peqqutiginerullugu.

Qinersisartut

Qinersisut akornanni isumasiuilaarnermi paasinarsivoq inuit isumagineqarneratigut ajornartorsiutinik aaqqiissutissat, Kangerlussuarmi mittarfiup attatiinnarneqarnissaa, kalaaliussuseq aamma oqaatsivut qinersinermi aalajangiisuusimasut.

Qinersisartut utoqqaanersaasa ilaata Martin Berthelsenip 94-inik ukiullip Siumut qinertarpaa.

- Siumukkormiutut pingaartippara, Kangerlussuarmi mittarfiup attatiinnarnissaa, Martin Berthelsen qinersivimmit aniartuutaa oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER