Assit takukkit: Juullimut niuffanneq quleriinni pingasuni
Københavnimi Kalaallit Illutaanni sapaatip akunnerata naanerani juullimut niuffatsitsisoqarpoq.
Naqqani naqqup-iluaniit illup quleriit qullersaat ilanngullugu juullimut nioqqutissanik ulikkaarpoq.
Katillugit 48-it tuniniaassallutik nalunaarsimapput, nioqqutigineqartullu juullimut tunissutissaqqissuupput kusanarluinnnartut, sapannganik, puisip amiinik, umimmaap qiviuinik tuttullu nassuinik sanaajullutik, allarpassuillu Juulimaap nunaanut attuumassutillit aamma tuniniarneqarlutik.
Soorunamilu kalaallit juullimut nipitittagaat tuniniarneqarpoq, suliarinnittuanit, eqqumiitsuliortumit Aka Høeghimit atsiorneqarsinnaalluni.
Pisiniarluartoqarpoq
Illup nammineq atuakkanik tuniniaavia, Københavnimi, immaqalu Danmarkimi, Kalaallit Nunaannut tunngasunik atuakkanik tuniniaaviup annersaat ammatinneqarpoq, tassanilu atuagaq Bjørnebrochen, eqqumiitsuliortoq Buuti Pedersen aamma kuultinik saffiortoq Nikolaj Appel suleqatigalugit suliarineqartoq pisiarineqarsinnaavoq. Tuniniaanermi iluanaatutit Nakuusamut, suliniut UNICEF-ip Namminersorlutillu Oqartussat suleqatigiillutik Kalaallit Nunaanni meeqqat pisinnaatitaaffii pillugit suliaqarfimmut, tunniunneqassapput.
Inuppassuit sapaatip akunnerata naanerani Løvstrædemukartut pisiniarluarput, pisiniallu kaalerpata qilalerpataluunniit Nanu Børn illumi naqqup-iluani kaffemik, themik æbleskivenik juullisunnitsunillu allanik sassaalliisarpoq. Illullu quleriit qullerpaani nerisassanik kissartunik aamma tuniniaasoqarluni.